މަނާ ބޭސް ބޭނުންކޮށްފައިވާކަމަށް ޓެސްޓުތަކުން ޔަގީންވުމުން، އިޓަލީގެ ޖުވެންޓަސްއަށް ކުޅެމުން އަންނަ ފްރާންސްގެ ޕޯލް ޕޮގްބާ 4 އަހަރަށް ފުޓުބޯޅައިގެ އެއްވެސް ހަރަކާތެއްގައި ބައިވެރި ނުވެވޭގޮތަށް ސަސްޕެންޑު ކޮށްފިއެވެ.

މަނާ ބޭސް ބޭނުންކުރުން ނުވަތަ ޑޯޕިންއަކީ ކުޅިވަރުގެ ބޮޑު ކުށެކެވެ. ޕޮގްބާ ޑޯޕިންއަށް ޓެސްޓުކޮށްފައިވަނީ މި ސީޒަން ފެށުނުއިރު، ރޭންޑަމްކޮށް އެކި ކުޅުންތެރިންގެ ޓެސްޓު ހަދަމުން ދިޔަ އިރެއްގައި، އޯގަސްޓް 20 ވަނަ ދުވަހުއެވެ. ފުރަތަމަ ޓެސްޓުން ޕޮޒިޓިވްވުމުން، އެކަން ޔަގީން ކުރުމަށް އޮކްޓޯބަރު މަހުގެ ތެރޭގައި  އިޓަލީގެ ނޭޝަނަލް އެންޓި-ޑޯޕިން ޓްރައިބިއުނަލް (ނޭޑޯ) އިން ވަނީ ދެވަނަ ޓެސްޓެއް ހަދާފައެވެ. އަދި ދެވަނަ ޓެސްޓުން ޔަގީން ކުރުމަށްފަހު އެންޓި-ޑޯޕިން ޕްރޮސެކިއުޓާ އޮފީހުން ނިންމީ އޭނާ ފުޓުބޯޅައިގެ އެއްވެސް ހަރަކާތެއްގައި 4 އަހަރު ހަރަކާތްތެރިނުވެވޭ ގޮތަށް ސަސްޕެންޑުކުރުމަށެވެ.

މީގެ އިތުރުން މިދިޔަ އަހަރުގެ ސެޕްޓެމްބަރު މަހުން ފެށިގެން ވެސް އޭނާ ހުރީ ސަސްޕެންޝަނެއްގައެވެ. އެ ސަސްޕެންޝަނަކީ ޑްރަގް ޓެސްޓެއް ހެދިއިރު ޕޮގްބާގެ ހަށިގަނޑުގައި ޓެސްޓޮސްޓީރޯން ލެވެލް މާ މަތިކަމަށް ފާހަގަ ކުރެވުމުން އައި ސަސްޕެންޝަނެކެވެ. ޓެސްޓޮސްޓީރޯންއަކީ ބުންވަރު ރަގަޅުކޮށްދޭ ހޯމޯންއެކެވެ.

މިހުރިހާކަމަކަށް ޕޮގްބާވަނީ އިންކާރުކޮށްފައެވެ. އޭނާ ގަބޫލުކުރާ ގޮތުގައި މިއީ ބަޔަކު މީހުން އޭނާގެ ޕްރޮފެޝަނަލް ކެރިއަރު ހަލާކުކޮށްލުމަށް ކުރި ކަމެކެވެ. އަދި މި މައްސަލަ އެޕީލްކޮށް، އެއީ ދޮގުކަން ސާބިތުކޮށްދޭން މަސައްކަތްކުރާނެކަމަށް، މި މައްސަލައާ ގުޅިގެން ޕޮގްބާ ދީފައިވާ ސްޓޭޓްމެންޓެއްގައި ވެއެވެ.

"ޕްރޮފެޝަނަލް އެތުލީޓެއްގެ ގޮތުގައި ހުރެ، އެއްވެސް ޒާތެއްގެ މަނާ ބޭހެއް ބޭނުންކޮށްގެން އަހަރެންގެ ޕާފޯމެންސް ރަގަޅު ކުރުމަކީ އަހަރެން ކުރާނެކަމެއް ނޫން. އަދި އަހަރެންނާއިއެކު މިހާތަނަށް ކުޅެފައިވާ އެހެން އެތުލީޓުންނަށާއި، އަހަރެން ކުޅެފައިވާ ކްލަބުތަކުގެ ސަޕޯޓަރުންނަށް އަބަދުވެސް އަހަރެން ގަދަރުކުރަން. އެމީހުންނަށް އަހަރެން އޮޅުވައެއް ނުލާނަން."

2018 ވަނަ އަހަރުގެ ވޯލްޑް ކަޕް ކާމިޔާބުކޮށްފައިވާ އުމުރުން 30 އަހަރުގެ ޕޮގްބާއަށް މި އައި ހުކުމާއެކު، 2027 ވަނަ އަހަރާއި ހަމައަށް ފުޓުބޯޅައިގެ ހަރަކާތްތަކުން އޭނާ ދުރަށް ދާންޖެހޭނެއެވެ. އަދި މި ސަސްޕެންޝަން ނިމޭއިރު އޭނާއަށް 34 އަހަރު ފުރޭނެއެވެ. އެއީ އާންމުކޮށް އެންމެ ފަތީ ފަންތީގައި ކުޅެމުން އަންނަ ކުޅުންތެރިން ރިޓަޔަމެންޓަށް ވިސްނާ އުމުރެވެ. އެހެންކަމުން، ފުޓުބޯޅައިގެ މަތީފަންތިން އޭނާ ދެން ފެންނާނެކަމާމެދު ޝައްކެވެ.