ޤައުމީ އެއަރލައިން މޯލްޑިވިއަނުން އަލުން ސްރީލަންކާއަށް ދަތުރުފެށުމަށް ނިންމައިފިއެވެ. މޯލްޑިވިއަނުން ބުނީ ސްރީލަންކާގެ ކޮލަންބޯއަށް އަންނަ އޭޕްރީލް މަހުގެ 25 ވަނަ ދުވަހުން ފެށިގެން އަލުން ދަތުރުތައް ފެށުމަށް ނިންމާފައިވާކަމަށެވެ.

މި ދަތުތައް އަލުން ފެށުމަށް ނިންމުމާއި ގުޅިގެން މޯލްޑިވިއަންގެ މެނޭޖިން ޑިރެކްޓަރ އިބްރާހިމް އިޔާސް ވިދާޅުވީ، މި ދަތުރުތަކުގެ ސަބަބުން 2 ގައުމުގެ ރައްޔިތުންނަށްވެސް ގިނަ ފައިދާތަކެއް ލިބިގެންދާނެކަމަށެވެ. އެކިއެކި ބޭނުންތަކުގައި ލަންކާއާއި ރާއްޖެއާއި ދެމެދު ދަތުރުކުރާ މީހުންނަށް މި ދަތުރުތަކުގެ ސަބަބުން ލުއިފަސޭހަތައް ލިބިގެންދާނެކަމަށް އޭނާ ވިދާޅުވިއެވެ.

މޯލްޑިވިއަނުން ވަނީ މިއަދުން ފެށިގެން ޓިކެޓް ބުކް ކުރުމުގެ ފުރުސަތުވެސް ހުޅުވާލާފައެވެ. ރާއްޖެއާއި ކޮލަންބޯއާއި ދެމެދު ހަފްތާއަކު 2 ދަތުރު ކުރާނެކަމަށް މޯލްޑިވިއަނުން ވަނީ ބުނެފައެވެ. މި ދަތުރުތައް ކުރާނީ ވެލާނާ އިންޓަނޭޝަނަލް އެއަރޕޯޓުން ބަންޑާރަ ނައިކެ އިންޓަނޭޝަނަލް އެއަރޕޯޓަށެވެ.

މޯލްޑިވިއަނުން މިހާރު ބައިނަލްއަޤްވާމީ ދަތުރުތައް ކުރަމުންދަނީ އިންޑިއާ އަދި ބަންގްލަދޭޝްއަށެވެ. 

މޯލްޑިވިއަނުން އެންމެ ފަހުން ސްރީލަންކާއަށް ދަތުރުކޮށްފައިވަނީ 2021 ވަނަ އަހަރުއެވެ. މި ދަތުރުތައް ހުއްޓާލީ އެ ޤައުމުގެ ހާލަތު އެއިރު ވަރަށް ބޮޑަށް ގޯސްވުމާއި ގުޅިގެންނެވެ.