ރިޔާސީ ޕްރައިމަރީ ނާކާމިޔާބުވެ ވަޑައިގެންނެވުމަށް ފަހުގައި، އެމްޑީޕީން ވަކިވެ ވަޑައިނުގެން ހުންނެވީ، އަނބުރާ ޕާޓީ އަތުލެއްވުމަށް ކަމުގައި ވިދާޅުވިތާ އެއްދުވަސް ފަހުން، ރައީސް ނަޝީދު އަމިއްލަފުޅަށް އެމްޑީޕީން ވަކިވެވަޑައިގެންފިއެވެ.

އެމްޑީޕީން ވަކިވެވަޑައިގެންނެވިކަން ރައީސް ނަޝީދު އިޢުލާނު ކުރެއްވީ، ޕާޓީން ވަކިވެވަޑައިގެންނެވުމަށް ނިންމަވައި، ޕާޓީގެ ޗެއާޕާސަންއަށް ފޮނުއްވި ސިޓީ ފުޅު ސޯޝަލް މީޑިއާގައި ހިއްސާކުރައްވައެވެ.

އެމްޑީޕީގެ ޗެއާޕާސަން ފައްޔާޒް އިސްމާއީލަށް ރައީސް ނަޝީދު ފޮނުއްވި ސިޓީފުޅު

ހޯމަ ދުވަހު ރައްޔިތުންގެ މަޖިލީހުގައި ބޭއްވި ނޫސްވެރިންގެ ބައްދަލުވުމުގައި ރައީސް ނަޝީދު ވިދާޅުވީ، އެމަނިކުފާނު އެމްޑީޕީގައި ދެމި ހުންނެވީ ޕާޓީ އަނބުރާ ހޯއްދެވުމަށް ކަމަށެވެ. 

ރިޔާސީ ޕްރައިމަރީ ނާކާމިޔާބުވެވަޑައިގެންނެވުމުން އެކަމާއި މެދު ހިތްޕުޅުހަމަޖެހިވަޑައިގެން އެމްޑީޕީގެ ތެރޭގައި ރައީސް ނަޝީދު އުފެއްދެވި ފިކުރެއްގެ ދިރުމުގައި ހިމެނިވަޑައިގަންނަވާ މަޖިލިސް މެމްބަރުންވެސް ވަނީ، ޕާޓީން ވަކިވެ "ދަ ޑިމޮކްރެޓްސް"ގެ ނަމުގައި އައު ސިޔާސީ ޕާޓީއެއް އުފެއްދުމުގެ މަސައްކަތް ފަށާފައެވެ. އަދި އެޕާޓީ އުފެއްދުމުގެ ބޭނުމަކީ ރައީސް ނަޝީދަށް 2023 ވަނަ އަހަރުގެ ރިޔާސީ އިންތިޚާބު ކާމިޔާބުކޮށްދިނުމަށް ޓިކެޓް ދިނުންކަމުގައިވެސް ގިނަ ބަޔަކު ޤަބޫލުކުރެއެވެ.