ދިވެހިސަރުކާރުގެ އަމިއްލަ ޚަރަދުގައި، އަދި އަމިއްލަ މަތިންދާ ބޯޓުތަކުގައި ރާއްޖޭގައި އެއާ އެމްބިލާންސްގެ ޚިދުމަތް މާދަމާ ފެށުމަށް ތައްޔާރުވެއްޖެއެވެ.

މިނިސްޓްރީ އޮފް ހެލްތުން މިއަދު ބޭއްވި ނޫސްވެރިންގެ ބައްދަލުވުމުގައި، މިނިސްޓަރ އޮފް ހެލްތު، ޑރ. ޢަބުދުﷲ ޚަލީލް ވިދާޅުވީ، އެއާ އެމްބިއުލާންސްގެ ޚިދުމަތް މާދަމާ ފެށުމަށް ވާންޖެހޭ އެންމެފަހުގެ ތައްޔާރީތައް މިހާރު ވަމުންދާކަމަށެވެ.

މާރިޗު މަހުގެ 1 ވަނަ ދުވަހު ރާއްޖޭގައި އެއާ އެމްބިއުލާންސްގެ ޚިދުމަތް ފެއްޓެވުމަކީ ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒުގެ ވަޢުދު ފުޅެކެވެ. އެ ވަޢުދުފުޅާއި އެއްގޮތަށް މާދަމާ އެ ޚިދުމަތް ފެށިގެންދާނެ ކަމުގައި، އަތޮޅުތަކަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން ރޭ، ނ. މަނަދޫ ރައްޔިތުންނާއި ބައްދަލުކުރައްވައި ދެއްކެވި ވާހަކަފުޅުގައި ރައީސް ޑރ. މުޢިއްޒު ވިދާޅުވިއެވެ.

ހެލްތު މިނިސްޓަރ ވިދާޅުވި ގޮތުގައި އެއާ އެމްބިއުލާންސްގެ ޚިދުމަތް ފެށުމަށްޓަކައި ދެ މަތިންދާ ބޯޓެއް ބޭނުން ކުރުމަށް ހަމަޖައްސާފައިވެއެވެ. އެއީ ޑޭޝް 8ގެ އެއް މަތިންދާ ބޯޓަކާއި، މޯލްޑިވިއަންގެ ސީޕްލޭނެކެވެ. މިނިސްޓަރ ވިދާޅުވީ، ޚިދުމަތް ފެށުމަށްޓަކައި، އެކަމަށް ބޭނުންވާ މުވައްޒަފުންވެސް މިހާރު މަގާފައިވާ ކަމަށެވެ. މިގޮތުން އެއާ އެމްބިއުލާންސްގެ އޮޕަރޭޝަންތަކަށް ޖުމުލަ 15 މުވައްޒަފުން މިވަގުތު ނަގާފައިވާ ކަމުގައި އެމަނިކުފާނު ވިދާޅުވިއެވެ.

މިހާތަނަށް ރާއްޖޭގައި ވައިގެ މިގުން ބަލި މީހުން އުފުލުމަށް މައިގަނޑު ގޮތެއްގައި ބޭނުންކޮށްފައި ވަނީ، އިންޑިއާއިން ރާއްޖެއަށް ހަދިޔާކޮށްފައިވާ ހެލިކޮޕްޓަރުތަކާއި، މޯލްޑިވިއަންގެ މަތިންދާ ބޯޓުތަކެވެ. އެހެން ނަމަވެސް މިއީ އެއާއެމްބިއުލާންސްގެ ގޮތުގައި ވަކި ޚާއްސަ ބޯޓުތަކެއް ހަމަޖައްސައިގެން މިޚިދުމަތް ރާއްޖޭގައި ފަށާ ފުރަތަމަ ފަހަރެވެ.