ގއ. ވިލިގިލީގައި ސަފާރީއެއް ބަންނަމުން ދިޔަ ހަރުގެއެއްގައި ރޯވެ ސަފާރީމުޅިން އަނދައިފިއެވެ.

އެމްއެންޑީއެފުން ވިދާޅުވީ، ހާދިސާގެ ރިޕޯޓް ލިބިފައި ވަނީ ރޭގެ އިރާކޮޅު ކަމަށާއި، މިހާރު އަލިފާން މުޅިން ނިވާލެވިފައިވާ ކަމަށެވެ. އެހެން ނަމަވެސް މިހާދިސާގައި ހަރުގޭގައި ބަންނަން ފަށާފައިހުރި ސަފާރީ ބޯޓު ވަނީ ބޭނުން ނުކުރެވޭ ވަރަށް އަނދައިގެން ގޮސްފައެވެ.

އަލިފާނުގެ ހާދިސާ ހިނގަން މެދުވެރިވި ސަބަބެއް އަދި ހޯދިފައެއް ނުވެއެވެ. އެހެން ނަމަވެސް ބައެއް މީހުން ތުހުމަތުކޮށްފައިވާ ގޮތުގައި އޮޑިހަރުގޭގައި ބަޔަކު ގަސްދުގައި ރޯކޮށްލީ ކަމަށް ބެލެވެއެވެ.

އެއޮޑިހަރުގޭގައި ސަފާރީ އުޅަނދު ބަނުމުގެ މަސައްކަތް ކުރަމުންދާތާ މިހާރު ވަނީ 5 އަހަރަށް ވުރެ ގިނަ ދުވަސްވެފައެވެ.

އަލިފާނުގެ ހާދިސާ ހިނގި އިރު، ގއ. ވިލިގިލީގައި އަލިފާން ނިވާލެވޭނެ އާލާތްތަކެއް ނެތުމުން، އޮޑިހަރުގެ އަނދައިގެންދާންދެން ބަލަން ތިބެންޖެހުނުކަން ފާހަގަކޮށް އެކަމުގެ ކަންބޮޑުވުންތައް ބައެއް ފަރާތްތަކުން ވަނީ ފާޅުކޮށްފައެވެ.

އަލިފާނުގެ މިހާދިސާ ފުލުހުން ވަނީ ތަޙްޤީޤުކުރަން ފަށާފައެވެ.