ރައީސުލްޖުމްހޫރިއްޔާ ތަސްދީޤު ނުކުރައްވައި، އަނބުރާ ފޮނުއްވާލެއްވި، އާއްމު އިންތިޚާބުގެ ޤާނޫނަށް އިސްލާޙް ގެނައުމުގެ ބިލް ރައްޔިތުންގެ މަޖިލީހުން އެއްވެސް ބަދަލެއް ނުގެނެސް ފާސްކުރެއްވުމާއި ގުޅިގެން މިއަދު ރައީސް އޮފީސް ބަންދުކުރެވޭނީ އެބިލް ގެޒެޓްކޮަށްފައި ކަމުގައި،  ޤާނޫނު އަސާސީ ޑްރާފްޓްކުރި ކޮމިޓީގެ މުޤައްރިރު އިބްރާހިމް އިސްމާޢީލް ވިދާޅުވެއްޖެއެވެ.

އިބްރާ މިހެން ވިދާޅުވީ، އާއްމު އިންތިޚާބުތަކާއި ބެހޭ ޤާނޫނަށް އިސްލާޙް ގެނައުމުގެ ބިލް ތަސްދީޤު ނުކުރައްވައި އަނބުރާ ރައްޔިތުންގެ މަޖިލިސްއަށް ފޮނުވާލެއްވުމާއި ގުޅިގެން އެބިލް ރައްޔިތުންގެ މަޖިލީހުން މިއަދު އެއްވެސް ބަދަލެއް ނުގެނެސް އަލުން ފާސްކުރެއްވުމާއި ގުޅިގެން އެކްސްގައި ލިޔުއްވި ޕޯސްޓެއްގައެވެ. އިބްރާ ވިދާޅުވީ،  މިބިލު ދެން ތަޞްދީޤު ނުކުރުމުގެ އެއްވެސް މަޙައްލެއް ނޯންނާނެ ކަމަށާއި، ކޯޓުންވެސް މިބިލާއި މެދު އިތުރު ގޮތެއް ނިންމޭނީ ތަޞްދީޤު ކުރުމަށްފަހުގައި ކަމަށެވެ.

އިބްރާވިދާޅުވީ، ތަޞްދީޤު ކުރަން ވާނެކަމަށް ޤާނޫނު އަސާސީގައި އޮވެ، ވަކި މުއްދަތެއް ނެތުމުން، އޭގެ މާނައަކީ ރައީސް އޮފީސް މިއަދު ބަންދުކުރެވޭނީ ގެޒެޓްކޮށްފައި ކަމަށެވެ.

ރައްޔިތުންގެ މަޖިލީހުގެ މެމްބަރުކަމާއި ރައްޔިތުންގެ މަޖިލީހުގެ ޚާއްޞަ މަޖިލީހުގެ މެމްބަރުކަން ކުރެއްވި، އިބްރާހީމް އިސްމާއީލަކީ، މިހާރު އަމަލުކުރެވެމުން މިދާ ފެހި ޤާނޫނު އަސާސީ ޑްރާފްޓްކުރި ކޮމިޓީގެ މުޤައްރިރެވެ. ޤާނޫނު އަސާސީ އާއި ގުޅޭ ގޮތުން އުފެދޭ ދުސްތޫރީ ބަހުސްތަކުގައި އާއްމުކޮށް އިބްރާ ވާހަކަފުޅު ދައްކަވައެވެ.