ރައީސުލްޖުމްހޫރިއްޔާ ތަސްދީޤު ނުކުރައްވައި، އަނބުރާ ފޮނުއްވާލެއްވި، އާއްމު އިންތިޚާބުގެ ޤާނޫނަށް އިސްލާޙް ގެނައުމުގެ ބިލް ރައްޔިތުންގެ މަޖިލީހުން އެއްވެސް ބަދަލެއް ނުގެނެސް ފާސްކޮށްފިއެވެ.

މިއަދު ބޭއްވި ރައްޔިތުންގެ މަޖިލީހުގެ ޖަލްސާގައި މިބިމް މަޖިލީހުން ފާސްކުރައްވާފައި ވަނީ ވޯޓުގައި ބައިވެރިވެވަޑައިގެންނެވި، 47 މެމްބަރުންގެ ވޯޓުންނެވެ. ބިލާއި ދެކޮޅަށް ވޯޓު ދެއްވީ، 14 މެމްބަރުންނެވެ.

ބިލް ރައްޔިތުންގެ މަޖިލީހަށް ސަރުކާރުން އަނބުރާ ފޮނުއްވާލާފައި ވަނީ، މިމަހުގެ 25 ވަނަ ދުވަހުގައެވެ. 

ރައްޔިތުންގެ މަޖިލީހުން މިއަދު މި ބިލް 2 ވަނަ ފަހަރަށް ފާސްކުރެއްވުމާއި ގުޅިގެން ރައީސުލްޖުމްހޫރިއްޔާއަށް މިބިލް ތަސްދީޤު ކުރައްވަިއ ގެޒެޓް ކުރެއްވުން ލާޒިމްވެގެން ދާނެއެވެ.

ސަރުކާރުން ބޭނުންވަނީ، ރައްޔިތުންގެ މަޖިލީހުގެ އިންތިޚާބު ރޯދަމަހުގެ ތެރޭގައި ބޭއްވުން ކަމަށްވާތީ، މިބިލް އަލުން މަޖިލީހުން ފާސްކުރެއްވި ނަމަވެސް ބިލް ތަސްދީޤުނުކުރައްވައި ބާއްވައިފާނެ ކަމަަށް ބައެއް ބޭފުޅުން ތުހުމަތު ކުރައްވައެވެ. މިފަދަ ހާލަތެއް 2010 ވަނަ އަހަރުވެސް ކުރިި މަތިވިއިރު އެފަހަރު، އެމައްސަލަ ދިވެހިރާއްޖޭގެ ސްޕްރީމްކޯޓަށް ހުށައެޅުމުން، އެކޯޓުން ނިންމާފައި ވަނީ، ދެވަނަ ފަހަރަށް މަޖިލީހުން ފާސްކުރާ ބިލެއް ތަސްދީޤުނުކޮށް ދަންމާލުމަށް ރައީސުލްޖުމްހޫރިއްޔާއަށް ލިބިވަޑައިގަންނަވާނީ 14 ދުވަހުގެ މުހުލަތެއް ކަމަށެވެ. 

އާއްމު އިންތިޚާބާއި ބެހޭ ޤާނޫނަށް ގެނައި އިސްލާޙް މަޖިލީހުން ދެވަނަފަހަރަށް ފާސްކޮށްފައި ވާއިރު އެކަމާއި ގުޅިގެން ސަރުކާރުން މިހާތަނަށް ވާހަކައެއް ނުދައްކައެވެ. އެހެން ނަމަވެސް އިލެކްޝަންސް ކޮމިޝަނުން ވިދާޅުވެފައި ވަނީ، އެކޮމިޝަނުން ތަބާވާނީ ޤާނޫނަށް ކަމަށެވެ. 

ރައްޔިތުންގެ މަޖިލީހުން ބިލް ދެވަނަ ފަހަރަށް ފާސްކުރެއްވި ނަމަވެސް އެބިލް ޤާނޫނަކަށްވާނީ ރައިސުލްޖުމްހޫރިއްޔާ އެބިލް ތަސްދީޤުކުރައްވައި ގެޒެޓްކުރެއްވުމުންނެވެ. އިލެކްޝަންސް ކޮމިޝަނަށް މިހާރު ކަނޑައަޅާފައިވާ ތާރީޚަށް ބަދަލެއް ގެނެވޭނީ އެބިލް ޤާނޫނަކަށް ވުމަށް ފަހުގައެވެ.