ސަރުކާރުގެ ފުރަތަމަ 14 ހަފްތާގައި ފުއްދާނެ ކަމަށް ހިމަނާފައިވާ ކަންކަން ނުފުއްދައި، ރައްޔިތުންނަށް އޮޅުވާލާފައިވާ ކަމަށް ބުނެ ރައްޔިތުންގެ މަޖިލީހަށް ކުއްލި މައްސަލައެއް ހުށަހަޅައިފިއެވެ. މި މައްސަލަ މިއަދު މަޖިލީހަށް ހުށަހެޅުއްވީ ގަލޮޅު ދެކުނު ދާއިރާގެ އެމްޑީޕީގެ މެންބަރު މީކާއިލް އަހުމަދު ނަސީމެވެ.

މައްސަލަ ހުށަހަޅުއްވަމުން އޭނާ ވިދާޅުވީ 100 ދުވަހުގެ ވައުދުތަކުގެ ތެރެއިން 35 ޕަސެންޓް ވައުދު ފުއްދާފައިވާ ކަމަށް ސަރުކާރުން ބުނި ނަމަވެސް އެއީ ބޮޑު ދޮގެއް ކަމަށެވެ. މީކާއީލް ވިދާޅުވީ، މައުލޫމާތު އިތުރަށް ދިރާސާކުރުމުން 59 އިންސައްތަ ކަންކަން ހާސިލް ނުވާ ކަމަށާއި، 18.9 އިންސައްތަ އަކީ ދޮގުކަމާއި، އަދި ހާސިލްވެފައި ވަނީ އެންމެ 24.3 އިންސައްތަ މަސައްކަތްކަން އެނގޭކަމަށް އޭނާ ވިދާޅުވިއެވެ.

މީކާއިލް ވިދާޅުވީ ދޮގާ އޮޅުވާލުމުގެ ތެރެއިން މި ސަރުކާރުން ވެރިކަމާ ހަވާލުވެ، 100 ދުވަހުގެ ތެރޭގައި އިންޑިއާ ސިފައިން ބާލާނެ ކަމަށް ބުނެ އޮޅުވާލާފައިވާ ކަމަށެވެ. އެގޮތުން، މަތީ ލެވެލްގެ ކޮމެޓީ ބައްދަލުވުންތަކެއް ފިޔަވާ އިތުރު މަސައްކަތެއް އެމީހުން ފޮނުވާލަން ކޮށްފައި ނުވާ ކަމަށް ވިދާޅުވި އެވެ.

ރާއްޖޭގެ މިނިވަންކަން ގެއްލޭފަދަ 100 އަށްވުރެ ގިނަ އެއްބަސްވުން ކުރީ ސަރުކާރުން ވެފައިވާ ކަމަށް ބުނި ނަމަވެސް، އެއްބަސްވުންތަކުގައި ހިމެނޭ އެފަދަ މާއްދާތައް މިއަދާ ހަމައަށް ހާމަކޮށްފައި ނުވުމަކީ ސަރުކާރުން ދޮގު ހަދާ މިންވަރު އެނގޭ ކަމެއް ކަމަށް މީކާއިލް ވަނީ ވިދާޅުވިފައެވެ.

ރާއްޖޭގެ ކަނޑުގެ ސަރަހައްދުން ބައެއް ގެއްލިއްޖެ ކަމަށްބުނެ އިޓްލޮސްގައި އިސްތިއުނާފް ކުރަން ބުނި މައްސަލައިގެ ހަބަރެއް ނެތް ކަމަށާއި، ކުރީ ސަރުކާރުން ނެގި ލޯނުތައް ރީފައިނޭންސް ކުރުމުގެ އެއްވެސް މަސައްކަތެއް ވެސް ނުކުރާ ކަމަށް ވިދާޅުވިއެވެ.