ރައީސުލްޖުމްހޫރިއްޔާ ތަސްދީޤު ނުކުރައްވައި، އަނބުރާ ފޮނުއްވާލެއްވި، އާއްމު އިންތިޚާބުގެ ޤާނޫނަށް އިސްލާޙް ގެނައުމުގެ ބިލް މިއަދު ބާއްވާ ރައްޔިތުންގެ މަޖިލީހުގެ ޖަލްސާއަށް އެޖެންޑާކޮށްފިއެވެ.

މިއަދުގެ ޖަލްސާ ފެށުމަށް ހަމަޖައްސާފައި ވަނީ، މިއަދު 13:00ގައެވެ.

ރައްޔިތުންގެ މަޖިލީހުގެ އިންތިޚާބު ފަސްކުރުމަށް އާއްމު އިންތިޚާބުގެ ޤާނޫނަށް އިސްލާޙްގެނައުމުގެ ބިލް ރައްޔިތުންގެ މަޖިލީހަށް ހުށައެޅުއްވީ، ރައްޔިތުންގެ މަޖިލީހުގެ އިހަވަންދޫ ދާއިރާގެ މެމްބަރު މުޙައްމަދު ޝިފާޢުއެވެ. ރައްޔިތުންގެ މަޖިލީހުން އެންމެ ފުރަތަމަ ފާސްކުރައްވާފައި ވަނީ، މިފެބުރުއަރީ މަހުގެ 11 ވަނަ ދުވަހު ބޭއްވި ރައްޔިތުންގެ މަޖިލީހުގެ ޖަލްސާއިންނެވެ. ބިލް ތަސްދީޤުކުރުމަށް ރައީސުލްޖުމްހޫރިއްޔާއަށް ފޮނުވުމުން، އެބިލް އަނބުރާ މަޖިލީހަށް ފޮނުވާލައްވާފައި ވަނީ ފެބުރުއަރީ މަހުގެ 26 ވަނަ ދުވަހުގައެވެ.

އާއްމު އިންތިޚާބުތަކާއި ބެހޭ ޤާނޫނަށް އިސްލާޙް ގެނައުމުގެ ބިލްގެ މައިގަނޑު މަޤުޞަދަކަށް ވެފައި އޮތީ، ރޯދަމަހުގެ ތެރޭގައި އިންތިޚާބުތައް ނުބޭއްވުމެވެ. މިގޮތުން ޤާނޫނަށް ގެނައި އިސްލާޙްގައި ހިމަނާފައި ވަނީ، އިންތިޚާބެއް ބާއްވާ ތާރީޚް ރޯދަމަހާއި ދިމާވާނަމަ، ރޯދަމަސް ނިމިގެން 10 ދުވަސް ފަހުން އިންތިޚާބު ބޭއްވުމަށެވެ. މިއަހަރު ބާއްވާ ރައްޔިތުންގެ މަޖިލީހުގެ އިންތިޚާބު ބޭއްވުމަށް އިލެކްޝަންސް ކޮމިޝަނުން ނިންމާފައި ވަނީ މި ފެށޭ މާރިޗު މަހުގެ 17ވާ އާދީއްތަ ދުވަހުގައި ކަމަށް ވާއިރު، އެދުވަސް ދިމާވަނީ، ރަމަޟާން މަހުގެ 7 ވަނަ ދުވަހާއެވެ. އިލެކްޝަންސް ކޮމިޝަނުން ވިދާޅުވެފައި ވަނީ، އިންތިޚާބުތައް ބޭއްވުމަށް ޤާނޫނުގައި ކަނޑައަޅާފައިވާ މުއްދަތުތަކަށް ބަލާއިރު، ރޯދަމަހުގެ ކުރިންވެސް އަދި ރޯދަ މަހުގެ ފަހުންވެސް އިންތިޚާބު ބޭއްވެން އޮތީ ޤާނޫނަށް އިސްލާޙް ގެނެސްގެން ކަމަށެވެ.

އާއްމު އިންތިޚާބުތަކާއި ބެހޭ ޤާނޫނަށް އިސްލާޙް ގެނައުމުގެ ބިލް ރައީސުލްޖުމްހޫރިއްޔާ، ތަސްދީޤު ނުކުރައްވައި އަލުން މަޖިލީހަށް ފޮނުއްވި ނަމަވެސް އެ ބިލަށް އެއްވެސް ބަދަލެއް ނުގެނެސް މަޖިލީހުން ދެވަނަ ފަހަރަށް ފާސްކުރައްވައިފިނަމަ، އެބިލް ތަސްދީޤުކުރެއްވުން ރައީސުލްޖުމްހޫރިއްޔާއަށް ލާޒިމް ވާނެއެވެ.

އާއްމު އިންތިޚާބާއި ބެހޭ ޤާނޫނަށް އިސްލާޙް ގެނައުމުގެ ބިލްގެ އިތުރުން މިއަދު ބާއްވާ ރައްޔިތުންގެ މަޖިލީހުގެ ޖަލްސާގެ އެޖެންޑާގައި ވަނީ އެހެން ގިނަ ކަންތައްތަކެއްވެސް ހިމަނާފައެވެ. އޭގެ ތެރޭގައި، 9 ބިލަކާއި، ޤަރާރެއްގެ ފުރަތަމަ ކިިޔުން އިއްވުން ހިމެނެއެވެ.

މީގެ އިތުރުން، ރައްޔިތުންގެ މަޖިލީހުން ކަނޑައަޅަންޖެހޭ މުސާރަ އާއި ޢިނާޔަތްތަކުގެ އޮނިގަނޑު މުރާޖަޢާކޮށް އަލުން އެކުލަވާލުމަށް، މާލިއްޔަތު ކޮމިޓީން ދިރާސާކޮށް ނިންމި ގޮތުގެ ރިޕޯޓުގެ މަސައްކަތްވެސް މިއަދު ޖަލްސާއަށް ވަނީ އެޖެންޑާކޮށްފައެވެ.