ރައީސް ޔާމީން އަލަށް އުފެއްދެވުމަށް މަސައްކަތް ކުރައްވަމުން ގެންދަވާ ޕާޓީ، ޕީއެންއެފް އިން އެޕާޓި ރަޖިސްޓްރީ ކުރުމަށް ބޭނުންވާ 3000 މެމްބަރުންގެ ސޮއެ ހަމަކޮށް އިލެކްޝަންސް ކޮމިޝަނަށް މިއަދު ހުށައަޅައިފިއެވެ.

އެކޮމިޝަންގެ ނައިބު ރައީސް އިސްމާއީލް ޙަބީބު ވިދާޅުވީ، ޕީއެންއެފް ފޯމުތަކުގެ ސައްޙަކަން ކަށަވަރު ކުރުމުގެ މަސައްކަތް މިހާރުވަނީ ފެށިފަފައި ކަމަށާއި، މަދުވެގެން 3000 މެންބަރުންގެ ފޯމުގެ ސައްޙަކަން ކަށަވަރުވުމުން، ލަހެއް ނުވެ، ޕީ.އެން.އެފް އުފެއްދުމަށްޓަކައި ޖަލްސާ ބޭއްވުމުގެ ހުއްދަ އިލެކްޝަންސް ކޮމިޝަނުން ޒެއިން އަބްދުﷲ ޔާމީން އަށް ދެއްވާނޭ ކަމަށެވެ. 

ޕީޕަލްސް ނެޝަނަލް ފްރޮންޓް (ޕީއެންއެފް) ގެ ނަމުގައި، ސިޔާސީ ޕާޓީއެއް އުފެއްދުމަށް، އިލެކްޝަންސް ކޮމިޝަނުން، ޒެއިން އަބްދުﷲ ޔާމީންއަށް ހުއްދަ ދެއްވާފައި ވަނީ، ހުސްވި އަހަރުގެ ނޮވެމްބަރު މަހުގެ 29 ވަނަ ދުވަހުގައެވެ. ޕާޓީ ރަޖިސްޓްރީ ކުރުމަށްޓަކައި ޕީއެންއެފްއިން ވަނީ، 3060 ފޯމް އިލެކްޝަންސް ކޮމިޝަނަށް ހުށައަޅާފައެވެ.

ރައީސް ޔާމީން އައު ސިޔާސީ ޕާޓީއެއް އުފެއްދެވުމުގެ މަސައްކަތް ފެއްޓެވީ، ރިޔާސީ އިންތިޚާބަށް ފަހުގައި، އެމަނިކުފާނަށް، ޕީޕީއެމް އަދި ޕީއެންސީގެ ކޮންޓްރޯލް ގެއްލުމާއި ގުޅިގެންނެވެ. ކުރިއަށް އޮތް ރައްޔިތުންގެ މަޖިލީހަށް ރައީސް ޔާމީން ތާއީދުކުރައްވައިގެން ބައެއް ކެންޑިޑޭޓުން ނުކުމެފައި ވާއިރު، ޕާޓީ ރަޖިސްޓްރީ ކުރުމުގެ މަރުހަލާގައިވާތީ، އެކެންޑިޑޭޓުން ނުކުންނަނީ އަމިއްލަ ގޮތުންނެވެ.