ކުރީގެ މަޝްހޫރު ފިލްމީ ތަރި، އިބްރާހިމް ޝާކިރު (ޝާކިރުބެ) ރޭ ނިޔާވެއްޖެއެވެ. 

ޝާކިރުބެ ނިޔާވީ އުމުރުން 85 އަހަރުގައެވެ.

ޝާކިރުބޭގެ މައްޗަށް ކުރެވޭ ކަށުނަމާދު އޮންނާނީ ، މިއަދުގެ މެންދުރު ނަމާދަށް ފަހުގައި، ހުޅުމާލެ ސަހަރާ މިސްކިތުގައެވެ. ޖަނާޒާ އޮންނާނީވެސް ހުޅުމާލެ ސަހަރާގައެވެ.

ޝާކިރުބެއަކީ، ފިލްމީ ދާއިރާގައި 1980ގެ ކުރީކޮޅުން ފެށިގެން 2000 ގެކުރީ ކޮޅާއި ހަމައަށް މަސައްކަތް ކުރެއްވި ބޭފުޅެކެވެ. ގިނައިން ފިލްމުތަކުގައި ކުޅުއްވާފައިވަނީ ބަައްޕައެއްގެ ރޯލެވެ.

ޤައުމީ ޚިދުމަތުގައި ޝާކިރުބެ އެންމެ ދިގު މުއްދަތެއްގައި ޚިދުމަތް ކުރެއްވީ ޓީވީ މޯލްޑިވްސްގައެވެ. ޝާކިރުބެ ވިދާޅުވެފައިވާ ގޮތުގައި ޓީވީގެ ވަޒީފާއަށް ވެދެވަޑައިގަތީވެސް ފިލްމް ކުޅެން ބޭނުންވާތީއެވެ. އެންމެ ފުރަތަމަ ކުޅުއްވި ފިލްމަކީ ޓީވީ މޯލްޑިވްސްއިން ތައްޔާރު ކުރި، މަޖޫރީ ސޭޓް ކިޔާ ފިލްމެއް ކަމުގައި ޝާކިރުވެ ވިދާޅުވެފައެވެ.

ފިލްމީ ޙަޔާތުގަޔާއި ޓީވީގެ ޙަޔާތުގައި ޝާކިިރުބެއަކީ، ލޯތްބާއި އިހްތިރާމް ހޯއްދަވާފައިވާ ނަމޫނާ ޝަޚްސިއްޔަތެކެވެ.