2017 ވަނަ އަހަރު ރަހުމް ކުޑަ ގޮތަކަށް ލިޓަސް ސާވިސް ސެންޓަރު ތެރޭގައި މަރާލި ރ. މީދޫ/ ފެންފިޔާޒުގެ މުޙައްމަދު އަނަސްގެ މަރުގެ މައްސަލައިގައި ދައުލަތުން ދައުވާ އުފުލާފައިވާ މީހުންގެ މައްޗަށް ކުށް ސާބިތުނުވާ ކަމަށް ކްރިމިނަލް ކޯޓުން ހުކުމް ކޮށްފިއެވެ.

31 ޖުލައި 2017 ވަނަ ދުވަހުގެރޭ ހިނގި މި މާރާމާރީގައި އަނަސްގެ ހަށިގަނޑުގެ 25 ތަނަކަށް ހަމަލާދީފައިވާއިރު، އޭނާއަށް ފަރުވާދިނުމަށް ހޮސްޕިޓަލަށް ގެންދިޔައިރުވެސް މަރުވެފައިވާކަމަށް ފުލުހުން ވަނީ ހާމަކޮށްފައެވެ. 

މި މައްސަލާގައި 7 މީހެއްގެ މައްޗަށް ދައުލަތުން ދައުވާ އުފުލާފައިވެއެވެ. އޭގެ ތެރޭގައި ހިމެނެނީ ގަސްތުގައި މީހުން މަރާލިކަމަށް ދައުވާ އުފުލި 3 މީހަކާއި، ގަސްތުގައި މީހަކު މަރާލުމުގައި ބައިވެރިވެފައިވާކަމަށް 4 މީހެކެވެ. ގަސްތުގައި މީހަކު މަރާލުމުގެ ދައުވާ ދައުލަތުން ކުރީ ޅ. ކުރެންދޫ އަސުރުމާގޭ، އަހުމަދު ޒަޔާނާއި، މ. ލޮނުމިދިލިގޭ، އަފްރާހު އަބްދުއްރައްޒާގު އަދި މ. ދިމިޝްގު، އުސްމާން ޝަރީފްގެ މައްޗަށެވެ. އަދި އެކަމުގައި ބައިވެރިވުމުގެ ދައުވާކުރީ ލ. ގަން ތުނޑި، ނަންނާރިގެ ޖުނައިހް އަބްދުﷲ އާއި ދަފްތަރު ނަންބަރު 1746 ސިމާހް މޫސާ އާއި ސ. ފޭދޫ ވެސްޓަންވިލާ ހަސަން މަހުފޫޒުގެ އިތުރުން ތ. ކިނބިދޫ ގުލްފާމުގެ، މުޙައްމަދު ޝާޒްގެ މައްޗަށެވެ.

މި މައްސަލައާ ގުޅިގެން ކްރިމިނަލް ކޯޓުން ނެރުނު ހުކުމުގައި ބުނެފައިވާގޮތުން، ދައުވާ ކުރެވޭ 7 މީހުން ކުށުގައި ބައިވެރިވި ކަމަށް ޝައްކެއް ނެތް މިންވަރަށް ސާބިތުވެފައެއް ނުވެއެވެ. ގާޒީ އަލީ ނަދީމް އިއްވެވި ހުކުމުގައި ބުނާ ގޮތުން، ދައުލަތުން ހެކީގެ ގޮތުގައި ހުށަހެޅި ސީސީޓީވީ ފުޓޭޖުތަކާއި ފުލުހުންގެ އިންޓެލިޖެންސް ރިޕޯޓުން ވެސް ދައުވާ ލިބޭ މީހުންނާ ދެކޮޅަށް ބުރަދަން ދެވޭ ވަރުގެ ހެއްކެއް ނެތެވެ. އަދި ސީސީޓީވީ ފުޓޭޖްތަކުގެ ޗެއިން އޮފް ކަސްޓަޑީ ފުރިހަމަ ނުވާކަމަށް ވެސް ވަނީ ފާހަގަކުރައްވާފައެވެ.

މީގެ އިތުރުން  ހެކީގެ ގޮތުގައި ދައުލަތުން ހުށަހަޅާފައިވާ ކޯލް ރެކޯޑުތަކާއި ހެކިންނާއި ސިއްރު ހެކިވެރިންގެ ހެކިބަހުން ވެސް އަނަސް މަރާލާފައިވަނީ އެ 7 މީހުންކަމަށް ސާބިތު ނުވާކަމަށް ވެސް ގާޒީ އަލީ ނަދީމް އިއްވެވި ހުކުމުގައި ވަނީ ބަޔާން ކުރައްވާފައެވެ.

ކްރިމިނަލް ކޯޓުގެ މި ހުކުމާ ގުޅިގެން އަނަސްގެ ބައްޕަ އަބްދުއްރާފިއު ވަނީ މާޔޫސްވެފައެވެ. އަދި އަނަސްއަށް އިންސާފު ލިބޭނެކަމަށް ކުރެވުނު އުއްމީދުތައް ވަނީ ފުނޑު ފުނޑު ވެފައެވެ.