ރައްޔިތުން ރައީސުލްޖުމްހޫރިއްޔާއަަށް ޝަކުވާ އާއި ޚިޔާލުތައް ހުށައެޅުމަށްޓަކައި ޚާއްޞަ ޕޯޓަލްއެއް ސަރުކާރުން ހުޅުވައިފިއެވެ.

"ރައްޔިތުންގެ އަޑު"ގެ ނަމުގައި ޤާއިމްކޮށްފައިވާ މިޕޯޓަލް އިފްތިތާޙްކޮށްދެއްވީ ރޭ ބޭއްވި، 'އަހާ' ސިލްސިލާގެ ދެވަނަ ފޯރަމްގެ ތެރެއިން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއެވެ.

ރައީސުލްޖުމްހޫރިއްޔާގެ އޮފީހުން ހާމަކުރައްވާފައިވާ ގޮތުގައި، މިޕޯޓަލް މެދުވެރިކޮށް ސީދާ ރައީސުލްޖުމްހޫރިއްޔާއަށް ޚިޔާލާއި ޝަކުވާ، ހުށައެޅޭނެއެވެ.

މިޕޯޓަލް އިފްތިތާހްކޮށްދެއްވައި ރައީސުލްޖުމްހޫރިއްޔާ ދެއްކެވި ވާހަކަފުޅުގައި ވިދާޅުވީ، ރައްޔިތުންގެ ޚާދިމެއްގެ ގޮތުގައި މަސައްކަތްކުރައްވާއިރު، ރައްޔިތުންނާ ގާތުން މަސައްކަތްކުރެއްވޭނެ މަގުތައް ފަހިކުރަން ޖެހޭކަން އެމަނިކުފާނު ޤަބޫލުފުޅު ކުރައްވާ ކަމަށެވެ.

ރައްޔިތުންގެ ޚިޔާލާއި ޝަކުވާތައް ހުށައެޅުމަށްޓަކައި ޚާއްޞަ ނިޒާމެއް ޤާއިމްކުރައްވާނެ ކަމުގައި ރައީސުލްޖުމްހޫރިއްޔާ ޑރ، މުޙައްމަދު މުޢިއްޒު އިޢުލާނު ކުރެއްވީ މި ފެބުރުއަރީ މަހުގެ 5 ވަނަ ދުވަހު އޮތް ރައްޔިތުންގެ މަޖިލީހުގެ ޖަލްސާއަށް ހުށައެޅުއްވި ރިޔާސީ ބަޔާނުގައެވެ.