ޖަރުމަން ބުންޑަސް ލީގާގައި ރޭ ލީގުގެ 17 ވަނައިގައި އޮތް މެއިންޒް 2-1 އިން ބަލިކޮށް، ޒަބީ އަލޮންސޯގެ ބެޔާން ލެވަކޫސެންއިން މެޗަކުން ބަލިނުވެ ލީގުގައި ދަމަހައްޓަމުން އަންނަ ރެކޯޑު 33 މެޗަށް ދަންމާލައިފިއެވެ. މިއާއެކު ލެވަކޫސެންއިން މިވަނީ މީގެ ކުރިން ލީގުގައި ބަލިނުވެ އެންމެ ގިނަ މެޗު ހަމަކޮށްފައިވާ ބެޔާން މިޔުނިކްގެ އެ ރެކޯޑު  މުގުރާލައިފައެވެ.

ލެވަކޫސެންގެ ބޭއެރީނާގައި ކުޅުނު މެޗުގައި އެ ޓީމުން ލީޑުނެގީ މެޗުގެ 3 ވަނަ މިނެޓުގައި ގްރެނިޓް ޖަކާ ޖެހި ގޯލަކުންނެވެ. ނަމަވެސް އޭގެ 5 މިނެޓު ފަހުން މެއިންޒްގެ ޑޮމިނިކް ކޮރް އިން މެޗު ހަމަހަމަ ކުރިއެވެ. ލެވަކޫސެންއަށް މެޗުން 3 ޕޮއިންޓު ޔަގީންކުރެވުނީ، ފަހު ހާފުގައެވެ. އެއީ މެޗުގެ 68 ވަނަ މިނެޓުގައި ރޮބަޓް އެންޑްރިޗް ކާމިޔާބުކުރި ގޯލަކުންނެވެ.

މި މޮޅާއެކު، ލެވަކޫސެންއިން މިވަނީ އެ ޓީމަށް ވުރެން އެއް މެޗު މަދުން ކުޅެފައިވާ ލީގުގެ ދެވަނައިގައި އޮތް ބެޔާން މިޔުނިކާ 11 ޕޮއިންޓުގެ ލީޑެއް ނަގާފައެވެ. 

ލީގުގައި ބާކީ 11 މެޗު ލެވަކޫސަންއަށް އޮތްއިރު، އެ ޓީމަށް އަދި ދުވަހަކުވެސް ލީގު ކާމިޔާބު ކުރެވިފައެއް ނުވެއެވެ. ނަމަވެސް ލީގުގެ ދެވަނަ 5 ފަހަރެއްގެ މަތިން ލިބިފައިވެއެވެ. އެގޮތުން އެ ޓީމު އެންމެ ފަހުން ލީގުގެ ދެވަނަ ހޯދާފައިވަނީ 2010/11 ސީޒަންގައެވެ. އަދި އެ ޓީމަށް އެންމެ ފަހުން ތައްޓެއް ކާމިޔާބު ކުރެވިފައިވަނީ މީގެ 20 އަހަރު ކުރިން 1993 ވަނަ އަހަރުއެވެ.