ރޯދަމަހުގައި އިންތިޚާބު ބޭއްވުން ހުއްޓުވުމަށް، އިލެކްޝަންސް ކޮމިޝަންގެ މެމްބަރުންގެ އިތުބާރު ނެތްކަމުގެ ވޯޓެއް ނަގަން ޖެހުނަސް އެކަންވެސް ކުރައްވާނެ ކަމުގައި ރައްޔިތުންގެ މަޖިލީހުގެ ނައިބު ރައީސް އަދި ރައްޔިތުންގެ މަޖިލީހުގެ ހޯރަފުށީ ދާއިރާގެ މެމްބަރު އަޙްމަދު ސަލީމް ވިދާޅުވެއްޖެއެވެ.

އެމްޑީޕީގެ ޕާލަމެންޓްރީ ގްރޫޕުގެ ފަރާތުން އިއްޔެ ހަވީރު މަޖިލީހުގެ އިދާރާއިގައި ބޭއްވި ނޫސްވެރިންގެ ބައްދަލުވުމުގައި، ސަލީމް ވިދާޅުވީ، މާރިޗު 17ގައި މަޖިލިސް އިންތިޚާބު ބާއްވަން ތާވަލުކޮށްފައި އޮތް އިރު، އެތާރީޚުގައި އިންތިޚާބު ބާއްވަނީ، ރައްޔިތުން އެދޭ ގޮތާއި ޚިލާފަށް ކަމަށެވެ. އަދި ރޯދަމަހުގެ ތެރޭގައި އިންތިޚާބު ބޭއްވުމަކީ ރައްޔިތުން އެދޭ ގޮތް ނޫންކަމަށާއި، ޤާނޫނުގައި މިހާރު ހުރި ތާރީޚްތަކަށް ބަލާއިރު، ރޯދައިގެ ފަހުން އިންތިޚާބު ބޭއްވުމަށް އިލެކްޝަންސް ކޮމިޝަނަށް ހުރަހެއް ނެތްކަމުގައި ސަލީމް ވިދާޅުވިއެވެ.

ސަލީމް ވިދާޅުވީ، އިލެކްޝަންސް ކޮމިޝަނުން ރޯދަމަހުގެ ތެރޭގައި އިންތިޚާބު ބޭއްވުމަށް ނިންމައި އިއުލާނުކުރީ، ރޯދައިގެ ފަހަށް އިންތިޚާބު ލަސްކުރުމަށް މަޖިލީހުންނާއި، ރައްޔިތުންވެސް އެދެމުން ދަނިކޮށްކަމަށެވެ. އަދި ސަރުކާރު ޕާޓީގެ ގިނަ މެމްބަރުންވެސް މަޖިލިސް އިންތިޚާބު ރޯދަމަހުގެ ތެރޭގައި ބޭއްވުމަށް ބޭނުން ނުވާ ކަމުގައި ސަލީމް ވިދާޅުވިއެވެ. ސަލީމް ވިދާޅުވީ، އެމްޑީޕީން މަސައްކަތް ކުރާނީ ރައްޔިތުން ބޭނުންވާ ގޮތަށް ކަމަށާއި، އެހެންކަމުން، މަޖިލިސް އިންތިޚާބު ރޯދަމަހު ނުބާއްވައި ފަސްކުރެވޭނީ އިލެކްޝަންސް ކޮމިޝަންގެ މެމްބަރުން ވަކިކޮށްގެން ކަމަށް ވާނަމަ އެކަންވެސް ކުރަން ތައްޔާރަށް ތިއްބެވިކަމަށެވެ.

ރައްޔިތުންގެ މަޖިލީހުގެ އިންތިޚާބު ރޯދަމަހު ނުބޭއްވުމަށް ސިޔާސީ ޕާޓީތަކުން ބޭނުންވާއިރު، އާއްމު އިންތިޚާބުތަކާއި ބެހޭ ޤާނޫނަށް ބަދަލު ގެނެސް ރޯދަމަހު އިންތިޚާބު ބޭއްވުން މަނާކޮށް، އެބިލް ތަސްދީޤުކުރެއްވުމަށް ރައީސުލްޖުމްހޫރިއްޔާއަށް މަޖިލީހުން ވަނީ ފޮނުއްވާފައެވެ. އަދި އެބިލާއި މެދު މިމަހުގެ 26 ވަނަ ދުވަހުގެ ކުރިން ރައީސުލްޖުމްހޫރިއްޔާ ގޮތެއް ނިންމަވަން ޖެހިވަޑައިގަންނަވާނެއެވެ. އިންތިޚާބު ފަސްކުރަން ރައީސުލްޖުމްހޫރިއްޔާ އާއި ސަރުކާރުން ބޭނުން ނުވާއިރު، އެބިލް ރައީސުލްޖުމްހޫރިއްޔާ ތަސްދީޤު ކުރައްވާފާނެ ކަމަކަށް ނުބެލެވެއެވެ. އަދި ބިލް ތަސްދީޤު ނުކުރައްވައިފިނަމަ، މަޖިލީހުން އެބިލް ދެވަނަ ފަހަރަށް ކުރިން އޮތް ގޮތަށް ފާސްކޮށްފިނަމަ، ބިލް ތަސްދީޤުކުރުން ރައީސުލްޖުމްހޫރިއްޔާއަށް ލާޒިމް ވާނެއެވެ.