މޫސުމަށް އަންނަ ބަދަލުތަައް ހަލުވިކަމުންނާއި، އެބަދަލުތަކުގެ ބޮޑުކަމުން، ރާއްޖެއަކީ ވަރަށް ބޮޑެތި ގެއްލުން ވެދާނެ ޤައުމަކަށް ވާތީ، މޫސުމަށް އަންނަ ބަދަލުތަކާއި ގުޅިގެން ހިންގާ މަޝްރޫޢުތަކަށް، ފައިސާ ލިބުން ލަސްވުމުގެ ސަބަބުން ރާއްޖެއަށް ގިންޖެހުންތަކާއި ކުރިމަތިވަމުންދާ ކަމުގައި، ރައްޔިތުންގެ މަޖިލީހުގެ ރައީސް މުޙައްމަދު އަސްލަމް ވިދާޅުވެއްޖެއެވެ.

އަސްލަމް މިހެން ވިދާޅުވީ، އޭޝިއަން ޕާލަމެންޓަރީ އެސެމްބްލީގެ 14 ވަނަ ޕްލީނަރީ ސެޝަންގައި ތަޤުރީރުކުރައްވަމުންނެވެ.

މިތަޤުރީރުގައި، މޫސުމީ ބަދަލުތަކުގެ ސަބަބުން ރާއްޖެއަށް ކުރިމަތިވަމުން އަންނަ ގޮންޖެހުންތަކަށް އަލިއަޅުއްވާލައްވައި، އަސްލަމް ދެއްކެވި ވާހަކަފުޅުގައި ވިދާޅުވީ، ރާއްޖެއަކީ މާގިނަ ވަޞީލަތްތަކެއް ނެތް ނަމަވެސް، ތިމާވެއްޓާއި ރައްޓެހި ގޮތްތަކަށް ކަންތައް ކުރުމުގައި ކުރި ހޯދާފައިވާ ޤައުމެއް ކަމަށެވެ. މިގޮތުން ރާއްޖެއިން ފުރަތަމަ ފަހަަރަށް، ހަކަތަ އާއި މޫސުމަށް އަންނަ ބަދަލުތަކާއި ފެނާއި ނަރުދަމާ އާއި ކުނި މެނޭޖުކުރުމާއި ގުޅޭ ޤާނޫނުތައް، މިހިނގާ 5 އަހަރުގެ ތެރޭގައި، ފާސްކުރެވިފައިވާކަން އެމަނިކުފާނުގެ ވާހަކަފުުޅުގައި ފާހަގަކުރެއްވިއެވެ. އަދި 2030 ވަނަ އަހަރ އަންނަން ވާއިރަށް ދިވެހި ރާއްޖެއަކީ ކާބަން ނިއުޓްރަލް ޤައުމަކަށް ވުމަށް ކަނޑައަޅާފައިވާ ލަނޑުދަނޑިއަށް ވާޞިލްވުމަށް ކުރެވޭ މަސައްކަތްތަކުގެ މައްޗަށްވެސް މަޖިލީހުގެ ރައީސްގެ ތަޤުރީރުގައި އަލިއަޅުއްވައި ލެއްވެވިއެވެ.

މީގެ އިތުރުން މަޖިލީހުގެ ރައީސްގެ ތަޤުރީރުގައި ރާއްޖެއިން ކުރަމުން އަންނަ ތިމާވެއްޓާއި ރައްޓެހި، އަދި ދެމެހެއްޓެނިވި، ދޮށީގެ މަސްވެރިކަމުގެ މައްޗަށް އަލިއަޅުއްވާލައްވައި، އަވަށްޓެރި ޤައުމުތަކުން މަސްވެރިކަން ކުރުމުގައިވެސް ދެމެހެއްޓެނިވި ގޮތްތަކަށް ޢަމަލުކުރުމުގެ މުހިއްމު ކަން ފާހަގަކުރެއްވިއެވެ.

އޭޝިއަން ޕާލަމެންޓަރީ އެސެމްބްލީގެ 14 ވަނަ ޕްލީނަރީ ސެޝަންގައި ރައްޔިތުންގެ މަޖިލީހުގެ ރައީސް މުހައްމަދު އަސްލަމް ކުރެއްވި ތަޤުރީރު ނިންމަވާލެއްވީ، ފަލަސްޠީނުގެ މައްސަލައިގައި ރާއްޖޭގެ ކަންބޮޑުވުންތައް ފާހަގަކުރެއްވުމަށް ފަހުގައެވެ. މިގޮތުން، ފަލަޞްތީނާއި އިޒްރޭލާއި ދެމެދު ހިނގަމުންދާ ހަނގުރާމަ ހުއްޓުވައި ސުލުޙަވެރި އަވަސް ޙައްލެއް ގެނައުމުގެ މުހިއްމުކަންވެސް އެމަނިކުފާނު ފާހަގަކުރެއްވިއެވެ.