ރައީސުލްޖުމްހޫރިއްޔާގެ އޮފީހާއި ޕަބްލިކް ސަރވިސް މީޑިއާ ގުޅިގެން ބާއްވަމުން އަންނަ "އަހާ" ފޯރަމްގައި، ރައީސުލްޖުމްހޫރިއްޔާ، ޑރ. މުޙައްމަަދު މުޢިއްޒު ބައިވެރވަޑައިގެން މިރޭ ސުވާލުތަކަށް ޖަވާބު ދެއްވާނެ ކަމުގައި ރައީސުލްޖުމްހޫރިއްުޔާގެ އޮފީހުން ވިދާޅުވެއްޖެއެވެ.

މި ސިލްސިލާގެ ދަށުން ބޭއްވި ފުރަތަމަ ފޯރަމްގައި، ވަޒީރުންގެ މަޖިލީހުގެ މެމްބަރުން ވަނީ ބައިވެރިވެވަޑައިގެން ސުވާލުތަކަށް ޖަވާބު ދެއްވާފައެވެ.

މިރޭގެ ފޯރަމަށް ސުވާލު ހުށައެޅުމުގެ ފުރުޞަތު މިހާރު ހުޅުވާލާފައިވާ ކަމަށާއި، އޭގެ އިތުރުން ވަގުތުން ރައީސުލްޖުމްހޫރިއްޔާ އާއި ސުވާލު ކުރުމުގެ ފުރުޞަތުވެސް ދޭނެ ކަމުގައި ރައީސުލްޖުމްހޫރިއްޔާގެ އޮފީހުން ވަނީ ވިދާޅުވެފައެވެ.

ސަރުކާރުން ކުރިއަށް ގެންދާ މަސައްކަތްތަކާ ބެހޭ މަޢުލޫމާތު ދެއްވައި، ރައްޔިތުންގެ ސުވާލުތަކަށް ސީދާ ޖަވާބު ދިނުމުގެ ގޮތުން، ކޮންމެ ދެ މަހުން އެއްމަހު ވަޒީރުން ބައިވެރިވެވަޑައިގަންނަވާ އާންމު ފޯރަމްތަކެއް ކުރިއަށް ގެންދަވާނެކަން ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވަނީ މީގެ ކުރިން އިޢުލާން ކުރައްވާފައެވެ. ހަމަ އެހެންމެ ކޮންމެ 3 މަހަކުން އެއްފަހަރު ސީދާ ރައީސުލްޖުމްހޫރިއްޔާވެސް މިގޮތަށް ރައްޔިތުންނާ ބައްދަލުކުރައްވައި، ރައްޔިތުންގެ ސުވާލުތަކަށް ޖަވާބުދެއްވުމަށް ފޯރަމެއް ބާއްވަވާނެކަންވެސް އެމަނިކުފާނު ވަނީ އިޢުލާން ކުރައްވާފައި ވެއެވެ.

އާއްމު ފޯރަމްތަކެއްގެ ގޮތުގައި މި ފޯރަމްތައް ސަރުކާރުން އިޝްތިހާރު ކުރި ނަމަވެސް ފޯރަމްތައް ކުރިއަށް ގެންދާނީ، ވަކި ގޮތަކަށް ބައްޓަންކޮށްގެންކަމުގައި، އެންމެ ފުރަތަމަ ބޭއްވި ފޯރަމުންވެސް ހާމަވެގެން ދިޔަ ކަމަށް، އިދިކޮޅު ސިޔާސީ ފަރާތްތަކުން ވަނީ ބުނެފައެވެ.

މިރޭގެ ފޯރަމް ފެށުމަށް ހަމަޖައްސާފައި ވަނީ، 8:45 ގައެވެ. މިފޯރަމް ދައުލަތުގެ މީޑިއާ ޕީއެސްއެމްގެ ޗެނަލްތަކުން ވަގުތުން ދުރަށް ފޮނުވާނެއެވެ.