ރާއްޖޭގެ ފޮރިން މިނިސްޓަރ (ނ.ޢ.ޢ.ވ) ޢަބުދުﷲ ޝާހިދު، އެމެރިކާގެ ސެކްރެޓަރީ އޮފް ސްޓޭޓް އެންޓަނީ ބްލިންކެން އާ ބައްދަލުކުރައްވައި ދިވެހިރާއްޖެއާ އެމެރިކާއިން އެކި ދާއިރާތަކުން ގުޅުން ބަދަހިކުރުމާއި ގުޅޭ ގޮތުން މަޝްވަރާކޮށްފިއެވެ.

މިބައްދަލުކުރެއްވުން އޮތީ ފޮރިން މިނިސްޓަރ ޢަބުދުﷲ ޝާހިދު މިހާރު އެމެރިކާއަށް ކުރައްވަމުން ގެންދަވާ ދަތުރުފުޅުގެ ތެރެއިން ހުކުރު ދުވަހުއެވެ.

މިބައްދަލުކުރެއްވުމާއި ގުޅޭތުން ފޮރިން މިނިސްޓަރ ޢަބުދުﷲ ޝާހިދު ކުރެއްވި ޓްވީޓުގައި ވިދާޅުވީ ރާއްޖެއާއި އެމެރިކާގެ ގުޅުން ކުރިޔަށް އޮތްތަނުގައި އިތުރަށް ބަދަހިކުރުމާއި ގުޅޭގޮތުން ނަތީޖާލިބެނިވި މަޝްވަރާތަކެއް ކުރެވިފައިވާ ކަމަށެވެ.

މިގޮތުން ދެބޭފުޅުން މަޝްވަރާކުރެއްވި ކަންކަމުގެ ތެރޭގައި ހިމެނެނީ، ދިވެހިންނަށް އެމެރިކާގެ ޔުނިވަސިޓީތަކުން މަތީތަޢުލީމުގެ އިތުރު ފުރުޞަތުތައް ފަހިކޮށްދެއްވުމާއި، އިޤުތިޞާދީ ދާއިރާއިން ދެޤައުމުގެ މެދުގައި ގުޅުން ބަދަހިކޮށް ވިޔަފާރިއާ އިންވެސްޓްމެންޓްގެ ދާއިރާއިން ފުރުޞަތުތައް ފަހިކުރުމާއި، ދެޤައުމުގެ ރައްޔިތުންގެ މެދުގައި ދަތުރުފަތުރު ފަސޭހަކުރުމުގެ ގޮތުން ވިސާގެ ލުއިތައް ދިނުމާއި، މޫސުމަށް އަންނަ ބަދަލުތަކުން ލިބޭ ގެއްލުންތައް ކުޑަކުރުމަށް ބައިނަލް އަޤުވާމީ މައިދާނުގައި އެކުގައި މަސައްކަތް ކުރުމާއި، އިންޑޯ ޕެސިފިކް ސަރަހައްދުގެ ޞުލުޙަ ދެމެހެއްޓުމަށް މަސައްކަތް ކުރެއްވުމެވެ.

މިބައްދަލުކުރެއްވުމުގެ އިތުރުންވެސް ފޮރިން މިނިސްޓަރ ޢަބުދުﷲ ޝާހިދު ވަނީ، އެމެރިކާ ސަރުކާރުގެ އިސްބައެއް ބޭފުޅުންނާއި، އެމެރިކާގެ ސެނެޓްގެ މެމްބަރުންނާއިވެސް ބައްދަލުކުރައްވާފައެވެ.