ރައްޔިތުންގެ މަޖިލީހުގެ މެމްބަރު ކަމުގައިހުންނެވި މެމްބަރަކު، އެމެމްބަރު މަޖިލީހަށް އިންތިޚާބުވި ޕާޓީ ދޫކުރައްވައި އެހެން ޕާޓީއަކާއި ގުޅިވަޑައިގެންފި ނަމަ، ގޮނޑި ގެއްލޭ ގޮތަށް ޤާނޫނަކުން ކަނޑައެޅުމަށްޓަކައި، އެންޓި ޑިފެކްޝަން ބިލެއް ރައްޔިތުންގެ މަޖިލީހަށް ހުށައަޅައިފިއެވެ.

އެމްޑީޕީގެ ޕާލަމެންޓްރީ ގުރޫޕުގެ ފަރާތުން ބޭއްވި ނޫސްވެރިންގެ ބައްދަލުވުމުގައި އެމްޑީޕީގެ ޕާލަމެންޓްރީ ގްރޫޕުގެ ލީޑަރު މުޙައްމަދު ރަޝީދު ޙުސައިން ވިދާޅުވީ، އެބިލް މަޖިލީހަށް ހުށައަޅުއްވާފައި ވަނީ، ރައްޔިތުންގެ ބޮޑެތި ކަންބޮޑުވުންތަކެއް އާއްމު ރައްޔިތުންގެ ތެރޭގައި އޮތުން ކަމަށެވެ. މިގޮތުން ޕާޓީއަކުން އިންތިޚާބުކުރާ މެމްބަރަކު އެޕާޓީއެއް ދޫކުރައްވައި އެހެން ޕާޓީއަކާއި ގުޅިވަޑައިގަތުމުގެ ކަންކަން މިހާރު ހިނގަމުންދާތީ، އެމްޑީޕީގެ ލީޑަރޝިޕަށް އެޝަކުވާ ލިބެމުންދާކަމުވެސް ރަޝީދު ވިދާޅުވިއެވެ.

އެހެން ނަމަވެސް އެ ބިލް މަޖިލީހުގެ ތެރޭގައި ކުރިޔަށް ގެންދިޔުމަށް ދަތިތަކެއް ހުރިކަމުގައިވެސް އޭނާ ވިދާޅުވިއެވެ.

މަޖިލީހުގެ މެމްބަރުންގެ ގޮނޑި ގެއްލޭ ގޮތަށް، ރައީސް ޔާމީނުގެ ސަރުކާރުގައިވެސް ޤާނޫނެއް ފާސްކުރިއެވެ. އެޤާނޫނު ފާސްކުރީ ރައްޔިތުންގެ މަޖިލީހުގެ 12 މެމްބަރެއްގެ ގޮނޑި ގެއްލިއްޖެކަމަށް ނިންމައި އޭރު ސަރުކާރުން ހިންގަމުން ގެންދިޔަ ކަންތައްގަނޑެއްގެ ތެރެއިންނެވެ. އަދި 18 ވަނަ ރައްޔިތުންގެ މަޖިލީހުން އެ ޤާނޫނު ފާސްކުރި އިރު ހިމަނާފައި އޮތީ، ރައްޔިތުންގެ މަޖިލީހުގެ މެމްބަރަކު އެބޭފުޅަކު ހުންނެވި ޕާޓީން ވަކިކޮށްފި ނަމަވެސް މަޖިލީހުގެ ގޮނޑި ގެއްލޭ ގޮތަށެވެ.

އެ ޤާނޫނު އުވާލުމުގެ ބިލް ފާސްކުރީ ރިޔާސީއިންތިޚާބުގައި ރައީސް ޔާމީނަށް ލިބިވަޑައިގެންނެވި ނާކާމިޔާބީއަށް ފަހުގައި، ހަމަ 18 ވަނަ ރައްޔިތުންގެ މަޖިލީހުންނެވެ. އެބިލް ތަސްދީޤުކުރައްވައި އެ ޤާނޫނު އުވައިލެއްވީވެސް ރައީސް ޔާމީނުގެ ސަރުކާރުގައެވެ.

އެމްޑީޕީން އަލުން އެންޓި ޑިފެކްޝަން ޤާނޫނެއް ގެނައުމަށް މަޖިލީހަށް ބިލެއް ހުށައަޅާފައި ވާއިރު، މިދައުރުގެ ތެރޭގައި، އެމްޑީޕީގެ 26 މެމްބަރަކު ވަނީ އެޕާޓީން ވަކިވެވަޑައިގެން އެހެންޕާޓީތަކާއި ގުޅިވަޑައިގެންފައެވެ. އެހެންނަމަވެސް އަދިވެސް ރައްޔިތުންގެ މަޖިލީހުގެ މެޖޯރިޓީ އޮތީ އެމްޑީޕީގެ އަތުގައެވެ.