ބްރެޒިލްގެ ކުރީގެ ތަރި އަދި ސްޕެއިންގެ ބާސެލޯނާއާއެކު ގިނަ ކާމިޔާބީތަކެއް ހޯދާފައިވާ ޑެނީ އަލްވޭޒްގެ މައްޗަށް ކުރަމުންދިޔަ ރޭޕުގެ ދައުވާ ސާބިތުވެއްޖެއެވެ. އޭނާއަށް ދައުވާކޮށްފައިވަނީ ބާސެލޯނާގެ ނައިޓް ކްލަބެއްގައި މީހަކު ރޭޕުކުރިކަމުގެ ތުހުމަތުގައެވެ.

މި މައްސަލަ ސާބިތުވުމާ ގުޅިގެން އޭނާއަށް ވަނީ 4 އަހަރާ 6 މަސްދުވަހުގެ ޖަލު ހުކުމެއް ކޮށްފައެވެ. މީގެ އިތުރުން، މި ހާދިސާގައި އަނިޔާ ލިބުނު ފަރާތަށް 150،000 ޔޫރޯ ދިނުމަށް ވެސް އެ ހުކުމުގައި އަމުރުކޮށްފައިވެއެވެ.

މިއީ 2022 ވަނަ އަހަރުގެ ޑިސެމްބަރު މަހުގެ 31 ވަނަ ދުވަހު ހިނގި ހާދިސާއެކެވެ. ނަމަވެސް 40 އަހަރުގެ ޑެނީ އަލްވޭޒް ވަނީ އޭރު އެކަމާ ދެކޮޅު ހަދާފައެވެ. އަލްވޭޒް ބުނަމުން ދިޔައީ، އެ މައްސަލަ ރައްދުވާ އަންހެން ކުއްޖާއަށް އެ މާހައުލު ދޫކޮށް ދިއުމުގެ ފުރުސަތު އޮތް ކަމަށެވެ. 

މައްސަލަ ބެލި ފަނޑިޔާރު ބުނެފައިވަނީ، އަލްވޭޒް އެ އަންހެން ކުއްޖާ ރޭޕް ކޮށްފައިވަނީ ނައިޓް ކްލަބުގެ ވީއައިޕީ ސަރަހައްދަކަށް ގެންގޮސްފައިކަމަށެވެ. އަދި އެކަން އެހެން މީހުންގެ ބަޔާންތަކުން ޔަގީންކުރެވޭކަމަށް ވެސް ފަނޑިޔާރު ބުނެފައިވެއެވެ. 

އަލްވޭޒްގެ ވާހަކަ ފަހުން ވަނީ އެކި ގޮތްގޮތަށް ބަދަލުވެފައެވެ. އެ އަންހެން ކުއްޖާއާއި ނައިޓް ކްލަބުގެ ވީއައިޕީ ސަރަހައްދުގައި ހުންނަ ފާހާނައިން ދިމާވިކަމަށާއި، ނަމަވެސް ދެ މީހުންގެ ދެމެދުގައި އެއްވެސް ކަމެއް ނުހިނގާކަމަށް ފުރަތަމަ ބުންޏެވެ. އޭގެ ފަހުން ބުނެފައިވަނީ، އެ އަންހެން ކުއްޖާއާއި އެކު ބަދަލު އަހުލާގީ ގުޅުން ހިންގާފައިވާނީ ދެމީހުން ވެސް އެގޮތަށް ބޭނުންވެގެން ކަމުގައި ކަމަށެވެ.

މި މައްސަލައާ ގުޅިގެން 2023 ވަނަ އަހަރުގެ ޖެނުއަރީ މަހުން ފެށިގެން އަލްވޭޒްހުރީ ވަގުތީ ބަންދެއްގައެވެ. 

އަލްވޭޒްވަނީ ބާސެލޯނާއަށް 400އަށް ވުރެން ގިނަ މެޗު ކުޅެދީފައެވެ. އަދި އޭނާ ބާސެލޯނާގައި ދެ ފަހަރެއްގެ މަތިން ހޭދަ ކުރި މުއްދަތުގައި، 6 ފަހަރު ސްޕެނިޝް ލީގު އަދި 3 ފަހަރު ޗެމްޕިއަންސް ލީގު ކާމިޔާބުކޮށްފައިވެއެވެ. އަދި އޭނާވަނީ 2022 ވަނަ އަހަރު ގަތަރުގައި ބޭއްވި ވޯލްޑް ކަޕްގައި ބްރެޒިލްގެ ސްކޮޑުގައި ވެސް ހިމަނާފައެވެ.