ކުރީގެ ރައީސުލްޖުމްހޫރިއްޔާގެ ނައިބު ފައިޞަލް ނަސީމް އެމްޑީޕީއަށް ސޮއެކުރައްވައި އެޕާޓީއާ ގުޅިވަޑައިގެންފިއެވެ.

ފައިސަލް އެމްޑީޕީއަށް ސޮއެކުރެއްވުމަށްފަހުގައި ޕާޓީގެ މެމްބަރޝިޕްފޯމް ވަނީ، ކުރީގެ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙާއި ހަވާލުކުރައްވާފައެވެ.

ފައިޞަލް ނަސީމް ސިޔާސީ މަސައްކަތްޕުޅު އެންމެ ފުރަތަމަ ފެއްޓެވީވެސް އެމްޑީޕީއާ އެކުގައެވެ. އެހެން ނަމަވެސް އެމަނިކުފާނު އޭގެ ފަހުން ޖުމްހޫރީޕާޓީ އާއި ގުޅިވަޑައިގެން އެޕާޓީގެ މެމްބަރެއްގެ ގޮތުގައި ގިނަ ދުވަސްތަކަކު ޚިދުމަތް ކުރެއްވި އެވެ. ރައީސުލްޖުމްހޫރިއްޔާގެ ނައިބުގެ މަޤާމަށް ފައިޞަލް ވަޑައިގެންނެވީވެސް، ގުޅިފައިވާ ޕާޓީތަކުން ނެރޭ ރަނިންމޭޓް ކަނޑައެޅުމަށް ޖުމްހޫރީ ޕާޓީގެ ތެރޭގައި ބޭއްވި އިންތިޚާބު ކާމިޔާބު ކުރައްވައިގެންނެވެ.

ރައީސުލްޖުމްހޫރިއްޔާގެ ނައިބު ކަމުގެ މަޤާމުގެ އިތުރުން އެމަނިކުފާނު ވަނީ މަދު ވަގުތުކޮޅަކަށް ދިވެހިރާއްޖޭގެ ރައީސުލްޖުމްހޫރިއްޔާގެ މަޤާމުވެސް ފުރުއްވާފައެވެ. މީގެ އިތުރުން ރައްޔިތުންގެ ޚާއްޞަ މަޖިލީހާއި ރައްޔިތުންގެ މަޖިލީހުގައިވެސް އެމަނިކުފާނު މަސައްކަތް ކުރައްވާފައިވެއެވެ. 

ފައިސަލް ނަޞީމަކީ، ރާއްޖޭގެ ވެރިކަމުގެ ހަޔާތުގައި، ރައީސުލްޖުމްހޫރިއްޔާކަމުގެ މަޤާމުގެ ދައުރު ފުރަތަމަ ފަހަރަށް ފުރިހަމަކުރެއްވި ނައިބު ރައީސެވެ. ވެރިކަމުގެ ދައުރު ނިމުމަށްފަހުގައި އެމްޑީޕީގެ ހަރަކާތްތަކުގައި ފައިޞަލް ނަސީމް އައީ ބައިވެރިވެވަޑައިގަންނަވަމުންނެވެ. މިގޮތުން މާލޭ ސިޓީގެ މޭޔަރުގެ އިންތިޚާބުގައި ވާދަކުރެއްވި ކެންޑީޑޭޓް އާދަމް އާޒިމަށް ތާޢީދުކުރައްވަިއ އާދަމް އާޒިމްގެ ކެމްޕޭން ހަރަކާތްތަކުގައި ފައިސަލް ބައިވެރިވެވަޑައިގެންނެވިއެވެ.

ސިޔާސީ ޚިދުމަތްތަކާއި އިޖުތިމާޢީ ޚިދުމަތްތަކުގައި އެމަނިކުފާނު ވަނީ އާއްމުގެ ލޯތްބާއި އިޚްތިރާމް ހޯއްދަވާފައެވެ.