ބޭރުގެ ކުންފުންޏަކަށް 12 ފަޅުރަށް ދޭ ގޮތަށް ގދ. ތިނަދޫގައި އިންޓަރނޭޝަނަލް އެއާޕޯޓެއް އެޅުމަށް އަންގާރަ ދުވަހު ސޮއެކުރީ އެގްރިމެންޓެއްގައި ނޫންކަމަށާއި، އެއީ މެމަރަންޑަމް އޮފް އަންޑަސްޓޭންޑިންގ (ފަހުމުނާމާ) އެއް ކަމުގައި ސަރުކާރުން ބުނެފިއެވެ.

އަންގާރަ ދުވަހު، ތިނަދޫގައި ބޭއްވި ރަސްމިއްޔާތުގައި، ތިނަދޫގައި އިންޓަރނޭޝަނަލް އެއާޕޯޓެއް އެޅުމަށް، ތައިލެންޑުގެ ޕޭން ޕެސިފިކް ކޮމްޕެނީ ލިމިޓެޑާއެކު ވަނީ ސޮއެކޮށްފައެވެ. ރައީސުލްޖުމްހޫރިއްޔާގެ އޮފީހުން ބުނެފައި ވަނީ، އަންގާރަ ދުވަހު ސޮއެކުރެވުނު އެއްބަސްވުމުގެ ދަށުން ތިނަދޫ ބައިނަލްއަޤްވާމީ ވައިގެ ބަނދަރު ތަރައްޤީކުރުމުގެ މަސައްކަތް އެކުންފުންޏާއި ހަވާލުކޮށްފައިވާ ކަމަށެވެ.

ރައީސުލްޖުމްހޫރިއްޔާގެ އޮފީހުން ޝާއިޢުކޮށްފައިވާ ޚަބަރުތަކުގައިވެސް އެބަސްވުމުގެ ގޮތުގައި ޢިބާރާތްކޮށްފައިވާ ތަންތަން މިހާރު ވަނީ، ފަހުމުނާމާއަށް ބަދަލުކޮށްފައެވެ. އެކަމާއި ގުޅޭ ގޮތުން މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރ އިން މިއަދު އާއްމުކުރި މީޑިއާ ބްރީފްގައިވެސް ބުނެފައި ވަނީ، ތައިލެންޑުގެ ޕޭން ޕެސިފިކް ކޮމްޕެނީ އާއެކު އަންގާރަ ދުވަހު ސޮއެކުރީ، އެމަޝްރޫޢު ކުރިޔަށް ގެންދިޔުމުގެ ކޮންޓްރެކްޓްގައި ނޫންކަމަށެވެ.

އެމިނިސްޓްރީން މިކަން ހާމަކުރެއްވީ،  ޕޭން ޕެސިފިކް ކޮމްޕެނީ ލިމިޓެޑަކީ އެފަދަ ބޮޑު މަޝްރޫޢެއް ހިންގުމުގެ ޤާބިލްކަން ހުރި ކުންފުންޏެއް ނޫންކަަން ހެކިތަކާއިއެކު ރާއްޖޭގެ އޮންލައިން ނޫސް "އަދަދު"އިން ހާމަކޮށްފައި ވަނިކޮށެވެ.

ކޮންސްޓްރަކްޝަން މިނިސްޓްރީން ވިދާޅުވީ، ޕޭން ފެސިފިކް ކޮމްޕެނީން ހުށައަޅާފައި ވަނީ، ތިނަދޫ އިންޓަރނޭޝަނަލް އެއާޕޯޓު ތަރައްޤިކުރާއިރު، 4 ކިލޯމީޓަރުގެ ރަންވޭ އަކާއި، އިންޓަރނޭޝަނަލް އަދި ޑޮމެސްޓިކް ޓަރމިނަލްއަކާއި، ސީޕްލޭން ޓަރމިނަލްއެއްގެ އިތުރުން އިންޓަރނޭޝަނަލް އެއާޕޯޓެއްގައި ހުންނަ އެހެން ވަޞީލަތްތައްވެސް ޤާއިމްކުރުމަށް ކަމަށެވެ. މީގެ އިތުރުންމަތީ ފަންތީގެ ރިސޯޓާއި ޔޮޓު މެރީނާއަކާއި، އަދި ފްލައިން ސްކޫލެއް ތަރައްޤީކުރުމަށް އެކުންފުނިން ހުށައަޅާފައިވާ ކަމަށްވެސް ކޮންސްޓްރަކްޝަން މިނިސްޓްރީން ވަނީ ބުނެފައެވެ.

އެމިނިސްޓްރީން ބުނީ، އެ މަޝްރޫޢު ކުރިޔަށް ގެންދިޔުމަށް ކޮންޓްރެކްޓްގައި (އެއްބަސްވުމުގައި) ސޮއިކުރެވޭނީ، ޕްރޮޕޯޒަލް ހުށައަޅާފައިވާ ފަރާތުގެ ފަންނީ އަދި މާލީ ޤާބިލިއްޔަތުކަން ކަށަވަރުކުރުމަށްފަހު، ބަލަންޖެހޭ ކަންތައްތައް ބަލައި، ދިވެހިރާއްޖޭގެ ޤާނޫނާއި ޤަވާއިދުތަކާއި އެއްގޮތްވާ ގޮތުގެ މަތިން ކަމަށެވެ.

ފަހުމުނާމާ އާއި އެއްބަސްވުމަކީ، ޤާނޫނީ ހައިސިއްޔަތު މުޅިން ތަފާތު ދެ އެއްޗެކެވެ. ފަހުމު ނާމާއަކީ، ވަކި މަގުސަދުތަކެއް ހާސިލުކުރުމަށްޓަކައި ދެ ފަރާތެއްގެ ނުވަތަ ގިނަ ފަރާތްތަކެއްގެ މެދުގައި ސޮއިކުރެވޭ ރަސްމީ އެއްބަސްވުމެއް ނަމަވެސް އާންމު ގޮތެއްގައި އެއީ ކުރިމަގުގައި ގާނޫނީ އިލްތިޒާމަކަށް މަގުފަހިކޮށްދޭ އެއްޗެކެވެ. ފަހުމުނާމާއަކީ ކަމެއް ކުރުމަށް ދެފަރާތުގެ މެދުގައި މަޝްވަރާތައް ފެށުމަށް ރަސްމީ ހައިސިއްޔަތު ދިނުމުގެ ގޮތުން ސޮއިކުރެވޭ އެއްޗެކެވެ.

އެއާޕޯޓާއި ބިންހިއްކުމާއި ގެދޮރުއެޅުން ފަދަ މަޝްރޫޢުތައް ހިންގުމަކީ ފަހުމުނާމާއެއްގެ ދަށުން ކުރެވޭ ކަންކަމެއް ނޫނެވެ. އެހެންނަވެސް ފަހުމުނާމާތަކުގެ ނަތީޖާއަށް ބަލައި، އަމަލީ މަސައްކަތްތައް ކުރިޔަށް ގެންދެވޭނެކަމަށް ފެނިއްޖެނަމަ، އެކަމެއް ކުރިޔަށް ގެންދިޔުމަށް ކޮންޓްރެކްޓް ނުވަތަ އެއްބަސްވުމުގައި ސޮއެކުރަންޖެހޭނެއެވެ.

މިއަދު ގއ. ވިލިގިލީގައި އިންޓަރނޭޝަނަލް އެއާޕޯޓެއް ތަރައްޤީކުރުމާއި ގުޅޭ ގޮތުންވެސް ބޭރުގެ ކުންފުންޏަކާއި އެކުގައި ވަނީ ފަހުމުނާމާއެއްގައި ސޮއެކޮށްފައެވެ.