ގއ. ވިލިގިލީގައިވެސް، އިންޓަރނޭޝަނަލް އެއާޕޯޓެއް އެޅުމަށްޓަކައި ބަޔަކާއި އެކު އެކަމުގެ އެއްބަސްވުމުގައި ސޮއެކޮށްފިއެވެ.

މިއެއްބަސްވުމުގައި ސޮއެކޮށްފައި ވަނީ، ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒު މިހާރު އަތޮޅުތަކަށް ކުރައްވާ ދަތުރުފުޅުގެ ތެރެއިން، ގއ. ވިލގިއްޔަށް ވަޑައިގެން އެރަށުގެ ރައްޔިތުންނާއި އެކު ބޭއްވެވި ބައްދަލުކުރެއްވުމުގެ ތެރެއިންނެވެ. މިއެއްބަސްވުމުގައި ސަރުކާރުގެ ފަރާތުން ސޮއެކުރެއްވީ، ކޮންސްޓްރަކްޝަން މިނިސްޓަރު ޑރ. އަބްދުﷲ މުއްޠަލިބެވެ.

މިމަޝްރޫޢު ހަވާލުކޮށްފައިވަނީ ބެލްޖިއަމްގެ ކުންފުންޏެއްކަމަށްވާ، ބެސިކްސް ކޮންސްޓްރަކްޝަން ގުރޫޕާއެވެ. އެކުންފުންޏަކީ، ދުބާއީގެ ބުރުޖް ޚަލީފާ ޢިމާރާތްކުރުމުގައިވެސް މަސައްކަތްކޮށްފައިވާ ކުންފުންޏެކެވެ.

މިކުންފުންޏަކީ، ބައިނަލްއަޤުވާމީ ފެންވަރުގައި އިންފްރާސްޓްރަކްޗަރ ބިނާކުރުމުގެ ބޮޑެތި މަޝްރޫޢުތަކެއް ކޮށްފައިވާ ކުންފުންޏެކެވެ. އެކުންފުނީގެ 50 އިންސައްތަ ޙިއްސާ އޮންނަނީ، މިސްރުގެ ކުންފުންޏަކަށެވެ.

މިބައްދަލުވުމުގައި ވާހަކަފުޅު ދައްކަވަމުން، ޕްރިންސިޕަލް އެޑްވައިޒަރ ޓު ދަ ޕްރެޒިޑެންޓް އޮން ޓްރޭޑް އެންޑް އިންވެސްޓްމަންޓް މުޙައްމަދު ޢަލީ ޖަނާހް ވިދާޅުވީ، ބެސިކްސް ކުންފުންޏަކީ، މިދިޔައަހަރުވެސް 300 މިލިއަންޑޮލަރުގެ ސާފު ފައިދާ ވެފައިވާ ކުންފުންޏެއް ކަމަށެވެ.

ވިލިނގިލީ އިންޓަނޭޝަނަލް އެއާޕޯޓާއި އިންޓަގްރޭޑެޓް ޓޫރިޒަމް ހަބް މަޝްރޫއެއްް މިއަދު އިއުލާނުކުރި އިރު، އެމަޝްރޫއާގުޅޭ ވޭރިއަސް ތްރީޑީ ވީޑިއޯ ޕްރެޒެންޓޭޝަނެއް ދައްކާފައިވެއެވެ.

ޕްރިންސިޕަލް އެޑްވައިޒަރ ޓު ދަ ޕްރެޒިޑެންޓް އޮން ޓްރޭޑް އެންޑް އިންވެސްޓްމަންޓް މުޙައްމަދު ޢަލީ ޖަނާހް ވިދާޅުވީ، މުޅި އެ މަޝްރޫޢުގެ އަގަކީ، 800 މިލިއަން ޑޮލަރު ކަމަށެވެ. މިމަޝްރޫޢު ކުރިޔަށް ގެންދިޔުމަށް ހަމަޖައްސާފައި ވަނީ، ގއ. ވިލިގިލިފަޅު ހިއްކައިގެންނެވެ.

ވިލިގިލީފަޅުގައި ބޮޑު އިންޓަރނޭޝަލް އެއާޕޯޓެއް އެޅުމަށް އެކަމުގެ ފަހުމުނާމާގައި މިއަދު ސޮއެކުރި، ވިލިގިއްޔާއި ޖެހިގެން އޮތް ކޫއްޑޫގައިވެސް ޑޮމެސްޓިކް އެއާޕޯޓެއް އޮވެއެވެ.