އެމެރިކާގައި ހުންނަ ދިވެހިރާއްޖޭގެ އެމްބަސީ, ފޮރިން މިނިސްޓަރ ޢަބުދުﷲ ޝާހިދު އިއްޔެ ހުޅުއްވައި ދެއްވައިފިއެވެ.

މިރަސްމިއްޔާތު އޮތީ އިއްޔެ އެމެރިކާގެ ވޮޝިންގޓަން ޑީސީގައެވެ.

މިރަސްމިއްޔާތުގައި އެމެރިކާ ސަރުކާރުގެ އިސްބޭފުޅުންނާއި، ސެނެޓްގެ ބައެއް މެމްބަރުން ބައިވެރިވިއެވެ.

މިއީ އެމެރިކާގައި ރާއްޖޭގެ އެމްބަސީއެއް ހުޅުވި ދެވަނަ ފަހަރެވެ. އެންމެ ފުރަތަމަ އެމެރިކާގައި ދިވެހިރާއްޖޭގެ އެމްބަސީއެއް ހުޅުވާފައި ވަނީ ރައީސް މައުމޫނު އެމަނިކުފާނުގެ ވެރިކަމުގެ އެންމެ ފަހުކޮޅު 2007 ވަނަ އަހަރުގައެވެ. 2008 ވަނަ އަހަރު ވެރިަކން ބަދަލުވުމަށްފަހުގައި، ރައީސް ނަޝީދުގެ ސަރުކާރުން އެ އެމްބަސީ އުވާލެއްވިއެވެ.

ދިވެހިރާއްޖޭގައި ވެސް މިހާރު ވަނީ އެމެރިކާގެ އެމްބަސީއެއް ހުޅުވާފައެވެ. ރާއްޖޭގައި ހުންނަ އެމެރިކާ އެމްބަސީގެ އޮފީސް ހުންނަނީ، ހުޅުމާލޭގައި ހުންނަ އުމަރު ޒާހިރު އޮފީސް އިމާރާތުގައެވެ.