ކުރީގެ ނޫސްވެރިޔާ، ހއ. ހޯރަފުށީ ރިވޯޑް، އައިމިނަތު ނުޒުހާ ބްރޯޑްކާސްޓިންގ ކޮމިޝަންގެ މެމްބަރުކަމަށް ޢައްޔަނު ކުރުމަށް ރައްޔިތުންގެ މަޖިލީހުން ރުހުން ދީފިއެވެ.

ބްރޯޑްކާސްޓިންގ ކޮމިޝަންގެ މެމްބަރުކަމަށް އައްޔަނުކުރެއްވުމަށް މަޖިލީހުން ރުހުން ދިނުމަށް މިއަދު ނެގި ވޯޓުގައި، މަޖިލީހުން ނުޒުހާއަށް ރުހުން ދީފައިވަނީ، ވޯޓުގައި ބައިވެރިވެވަޑައިގެންނެވި މެމްބަރުންގެ އިއްތިފާޤުންނެވެ. މިގޮތުން ވޯޓުގައި ބައިވެރިވެވަޑައިގެންނެވި 34 މެމްބަރުންވެސް ވޯޓު ދެއްވީ ނުޒުހާއަށް ރުހުން ދިނުމަށެވެ.

ނުޒުހާއަށް ބްރޯޑްކާސްޓިންގ ކޮމިޝަންގެ މެމްބަރުކަމަށް ރުހުން ދީފައި މިވަނީ، ބްރޯޑްކާސްޓިންގ ކޮމިޝަނަށް މެމްބަރަކު ޢައްޔަނުކުރެއްވުމަށްޓަކައި ރައީސުލްޖުމްހޫރިއްޔާ 5 ބޭފުޅެއްގެ ނަން މަޖިލީހަށް ފޮނުއްވިތާ އެއް އަހަރު ވީފަހުންނެވެ.

ބްރޯޑްކާސްޓިންގ ކޮމިޝަންގެ މެމްބަރުކަމުން، 2023 ވަނަ އަހަރުގެ ޖެނުއަރީ 8 ވަނަ ދުވަހު،  އެކޮމިޝަންގެ ނައިބުރައީސް ކަމުގައި ހުންނެވި، އަޙްމަދު ގައިސް އިސްތިއުފާ ދެއްވުމުން، ބްރޯޑްކާސްޓިންގ ކޮމިޝަންގެ މެމްބަރުކަމަށް ކުރިމަތިލުމަށް ހުޅުވާލުމުން ގިނަ އަދަދެއްގެ ބަޔަކު ކުރިމަތި ލިއެވެ.