ގދ. ތިނަދޫގައި އިންޓަރނޭޝަލް އެއާޕޯޓު އަޅަނީ ދައުލަތުން އެއްވެސް ޚަރަދެއް ކުރަން ނުޖެހޭ ގޮތަށް، އެމަސައްކަތް ކުރާ ކުންފުންޏަށް ބަދަލުގައި ރިޒޯޓް ހަދަން 12 ރަށް ދިނުމަށްފަހުގައި ކަމަށް ސަރުކާރުން ހާމަކުރައްވައިފިއެވެ.

އިއްޔެ ވަނީ، ތިނަދޫގައި އިންޓަރނޭޝަލް އެއާޕޯޓެއް އެޅުމަށް، މަސައްކަތް ހަވާލުކޮށްފައިވަނީ ތައިލެންޑުގެ ޕޭން ޕެސިފިކް ކޮމްޕެނީ ލިމިޓެޑާއެވެ. އްބަސްވުމުގައި ދިވެހިރާއްޖޭގެ ފަރާތުން ސޮއިކުރެއްވީ މިނިސްޓަރ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރ ޑޮކްޓަރ ޢަބްދުﷲ މުއްޠަލިބެވެ. މި މަޝްރޫޢުގެ ޕްރޮޕޯނަންޓްގެ ފަރާތުން ސޮއިކުރެއްވީ ޕޭން ޕެސިފިކް ކޮމްޕެނީގެ ސީ.އީ.އޯ ޖިރާޓް ޕެތްނުންތަވޮންގް އެވެ.

މިއެއްބަސްވުމުގައި ސޮއެކުރުމުގެ ރަސްމިއްޔާތު ބާއްވާފައި ވަނީ ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒު ހުވަދުއަތޮޅަށް ކުރައްވަމުން ގެންދަވާ ރަސްމީ ދަތުރުފުޅުގެ ތެރެއިން ރޭ، ގދ. ތިނަދޫގެ ރައްޔިތުންނާއި އެކު ބޭއްވި ބައްދަލު ކުރެއްވުމުގައެވެ.

އެއްބަސްވުމުގައި ސޮއެކުރެއްވުމަށްފަހު، ކޮންސްޓްރަކްޝަން މިނިސްޓަރ، ޑރ. ޢަބުދުﷲ މުައްޠަލިބު ވިދާޅުވީ، ތިނަދޫގައި އިންޓަރނޭޝަނަލް އެއާޕޯޓެއް އެޅުމާއި ހަވާލުވި ކުންފުނިން، ހުވަދު އަތޮޅުގައި 12 ރިޒޯޓު ތަރައްޤީ ކުރާނެ ކަމަށެވެ.

ތިނަދޫ އިންޓަރނޭޝަނަލް އެއާޕޯޓުގެ މަޝްރޫޢު ސަރުކާރުން ރޭ އިޢުލާނު ކުރިއިރު، އެމަޝްރޫއާއި ގުޅޭ ގޮތުން މާގިނަ މައުލޫމާތެއް އަދި ސަރުކާރުން ހާމަކޮށްފައެއް ނުވެއެވެ. އެހެން ނަމަވެސް ކޮންސްޓްރަކްޝަން މިނިސްޓަރ ޑރ. ޢަބުދުﷲ މުއްޠަލިބުގެ ވާހަކަފުޅުން ހާމަވެފައި ވަނީ، އެމަޝްރޫޢަކީ، ރާއްޖޭގައި މިހާރު ފަތުރުވެރިކަމުގެ ސިނާޢަތް ހިނގަމުން އަންނަގޮތާއި ޚިލާފަށް ވަކި އެއްކުންފުންޏަކަށް ޚާއްޞަ އިމްތިޔާޒާއި ބާރުތަކެއް ލިބިގެންދާނެ ގޮތަށް ހިނގާނެ މަޝްރޫއެއް ކަމަށެވެ. އެމަޝްރޫއުގެ މައުލޫމާތުތައް އެންމެ ރަނގަޅަށް ހާމަކޮށްފައިނުވާކަމަށް ބުނެ އިދިކޮޅު ފަރާތްތަކުން ވަނީ ސަރުކާރަށް ފާޑު ކިޔާފައެވެ.

ތިނަދޫ ފަޅުގައި އިންޓަރނޭޝަނަލް އެއާޕޯޓެއް އެޅުމަށް ސަރުކާރުން ނިންމާފައި ވާއިރު، ތިނަދޫ އާއި ދާދިގާތުގައި އޮތް ކާޑެއްދޫ އެއާޕޯޓަކީ، ބުރިޖަކުން ގުޅުވައިލެވޭނެ އަދި ކުދި ލޯންޗުފަހަރުގައި 7 މިނިޓްގެ ރާސްތާއެއް އެއަރޕޯޓެކެވެ. ކާޑެއްދޫ އެއާޕޯޓު ހިންގަމުން ދަނީ ވިލާ އެއާއިންނެވެ. ކާޑެއްދޫ އެއާޕޯޓް އިންޓަރނޭޝަނަލް އެއާޕޯޓެއްގެ ގޮތުގައި ތަރައްޤީކުރުމުގެ ވާހަކަތައްވެސް މީގެ ކުރީ ސަރުކާރުތަކުގައި ދެކެވިފައިވެއެވެ.

މީގެ އިތުރުން ކާޑެއްދޫ އާއި، ތިނަދޫ އެއްގަމު މަގުން ގުޅާލުމަށްޓަކައި ކޯޒްވޭތަކާއި ބުރިޖްއެޅުމަށް ބޭނުންވާ ފީސިބިލިޓީ ހެދުމަށް ހުސްވި ޖެނުއަރީ މަހުގެ 24 ވަނަ ދުވަހު ކޮންސްޓްރަކްޝަން މިނިސްޓްރީން ވަނީ ޢިއުލާނުވެސްކޮށްފައެވެ.

ތިނަދޫއަކީ، ރާއްޖޭގެ ދެކުނުން އެންމެ ބޮޑު އާބާދިއެއް އޮތް ރަށެވެ. އަދި ދިރިއުޅުމާއި ޟަރޫރީ އެހެން ބޭނުންތަކަށް، ގިނަ އަދަދެއްގެ މީހުން ތިނަދޫގައި އަންނަނީ ވަޒަންވެރިވެސް ވަމުންނެވެ.