ރާއްޖޭގެ ބޭރުގެ ދަރަނީގެ އަދަދަކީ، 120 ބިލިއަން ރުފިޔާކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވި ވިދާޅުވުން ރަނގަޅު ނޫންކަމުގައި، ކުރީގެ ފިނޭންސް މިނިސްޓަރ އިބްރާހީމް އަމީރު ހާމަކުރައްވައިފިއެވެ.

ކުރީގެ ފިނޭންސް މިނިސްޓަރ އިބްރާހީމް އަމީރު އެކްސްގައި ކުރެއްވި ޕޯސްޓްގައި ވިދާޅުވީ، 2023ވަނަ އަހަރު ނިމުނުއިރު ދަޢުލަތުގެ ބޭރުގެ ދަރަނީގެ ޖުމްލައަކީ 51.1 ބިލިއަން ރުފިޔާ ކަމަށާއި، އެ 51 ބިލިއަން އަކީ ސިދާ ދައުލަތުން ބޭރުގެ ފަރާތްތަކުން ނަގާފައިވާ 37.3 ބިލިއަން ރުފިޔާގެ އިތުރުން ދަޢުލަތުން ސޮވްރިންގ ގެރެންޓީދީގެން ނަގާފައިވާ 13.7 ބިލިއަން ރުފިޔާ ހިމެނޭހެން ޖުމްލަ އަދަދު ކަމަށެވެ.

މީގެ އިތުރުން ކުރީގެ ފިނޭންސް މިނިސްޓަރ އިބްރާހިމް އަމީރު ވިދާޅުވީ، ސަރުކާރުތައް ބަދަލުވިޔަސް މި ޤައުމު ނުހުއްޓި ކުރިޔަށް ދާނެކަމަށާއި، 2018 ވަނަ އަހަރު އެމްޑީޕީން ސަރުކާރާއި ހަވާލުވި އިރުވެސް  ސަރުކާރުން އާއްމު ކުންފުނިތަކަށް އެތައް ބިލިއަން ރުފިޔާގެ ބިލުތަކެއް ދައްކަން ހުރިކަމަށެވެ. އޭރު ކޮންމެ މިނިސްޓްރީއަކުން އެ ވާހަކަ ނުދައްކާ ކަމަށާއި، އެވާހަކަތައް ސިޔާސީ ބޭނުމަށް ދައްކާ ވަރަށް ވުރެ ޒިންމާދާރުވާން ޖެހޭ ކަމަށެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒާއި އެމަނިކުފާނުގެ ސަރުކާރުގެ ވަޒީރުންވެސް ވިދާޅުވަމުން ގެންދަވަނީ، ރާއްޖޭގެ ބޭރުގެ ދަރަނި 120 ބިލިއަނަށް އަރާ ކަމަށެވެ. އެހެން ނަމަވެސް އެވާހަކަތައް، ކުރީ ސަރުކާރުގެ އިސްވެރިން ދޮގުކުރައްވާފައިވެއެވެ.