Advertisement
ޢަބުދުﷲ ޝާހިދު ---
އިންތިޚާބަކާއި ނުލައި އެމްޑީޕީގެ ރައީސްކަން ޝާހިދަށް
އެމްޑީޕީގެ ރައީސް ކަމުގެ މަޤާމަށް ކުރިމަތިލުމަށް ހުޅުވާލި ފުރުޞަތުގައި ޢަބުދުﷲ ޝާހިދު ފިޔަވައި އެހެން ބޭފުޅަކު ކުރިމަތި ލައްވާފައި ނުވާތީ އެމަނިކުފާނު އެމަޤާމަށް ހޮވިއްޖެކަމުގައި އެމްޑީޕީން އިއުލާނުކޮށްފިއެވެ.
އެމްޑީޕީން އެޕާޓީގެ ރައީސް ކަމުގެ މަޤާމަށް ކުރިމަތިލުމަށް ހުޅުވާލީ، މިފެބުރުއަރީ މަހުގެ 13 ވަނަ ދުވަހު އެވެ. މިއަދު މުއްދަތު ހަމަވިއިރު، ރައީސް ކަމުގެ މަޤާމަށް ކުރިމަތިލައްވާފައި ވަނީ، ޢަބުދުﷲ ޝާހިދު އެކަންޏެވެ. އެމްޑީޕީން މީގެ ކުރިންވެސް ޢަމަލު ކުރަމުން އަންނަ ގޮތަކީ، އެއްކެނޑިޑޭޓަކު ކުރިމަތިލައްވައިފިނަމަ އެ މަޤާމެއްގެ އިންތިޚާބު ނުބޭއްވުމެވެ.
މީގެ ކުރިން އެމްޑީޕީގެ ރައީސް ކަމުގެ މަޤާމަކީ ވަރަށް ވާދަވެރި އިންތިޚާބުތަކެއް ބާއްވާފައިވާ މަޤާމެކެވެ. މިވަގުތު އެމްޑީޕީގެ ރައީސް ކަމުގައި ހުންނެވީ، ކުރީގެ ރައީސުލްޖުމްހޫރިއްޔާ، އިބްރާހީމް މުޙައްމަދު ޞާލިޙެވެ.
އަބުދުﷲ ޝާހިދު އެމްޑީޕީއާ ގުޅިވަޑައިގެންނެވީ، 2013 ވަނަ އަހަރުގައެވެ. އޭރު އެމަނިކުފާނު ހުންނެވީ ރައްޔިތުންގެ މަޖިލީހުގެ ރައީސް ކަމުގެ މަޤާމުގައެވެ.
ޢަބުދުﷲ ޝާހިދަކީ، ދައުލަތުގެ ގިނަ އިސް މަޤާމުތަކެއް ފުރުއްވާފައިވާ އަދި، އދ.ގެ އާއްމު މަޖިލީހުގެ ރައީސްކަންވެސް ކުރައްވާފައިވާ ބޭފުޅެކެވެ. އެމަނިކުފާނަކީ، ރާއްޖޭގެ ސިޔާސީ މައިދާނުގައި މިވަގުތު ހުންނެވި އެންމެ ތަޖުރިބާކާރު އެއްބޭފުޅާއެވެ.
