އައިޑީކާޑު ހެއްދުމުގެ ކަންކަން ލުއި ފަސޭހަ ކޮށްދިނުމުގެ ގޮތުން، ކާޑު ބަލައި ވެރިފަރާތުގެ ސިޓީއަކާއެކު ފޮނުވާ ފަރާތްތަކަށް އައިޑީ ކާޑު ދޫކުރާ ގޮތަށް ހަމަޖައްސާފައިވާ ކަމުގައި ޑިޕާޓްމަންޓް އޮފް ނޭޝަނަލް ރެޖިސްޓްރޭޝަނުން ވިދާޅުވެއްޖެއެވެ.

އެޑިޕާޓްމަންޓުން ނެރުއްވާފައިވާ ސަރކިއުލާއެއްގައި ވިދާޅުވެފައި ވަނީ، އެބަދަލަށް އަމަލުކުރަންފެށުމަށް ހަމަޖައްސާފައި ވަނީ މިފެބުރުއަރީ މަހުގެ 25ވާ އާދިއްތަ ދުވަހުން ފެށިގެން ކަމަށެވެ.

ވެރިފަރާތުގެ ބަދަލުގައި އައީޑިކާޑާއި ހަވާލުވާން އަންނަ ފަރާތުން ސިޓީއެއް ގެނައުމުން އެފަރާތަށް އައިޑި ކާޑު ދޫކުރި ނަމަވެސް ކާޑު ނުލިބިގެން ވެރިފަރާތުން ޝަކުވާއެއްކޮށްފި ނަމަ އެމައްސަލައެއް ތަޙްޤީޤުކުރުމަށްޓަކައި ފުލުހުންނަށް ހުށައަޅައިގެން ކުރިޔަށް ގެންދާނެ ކަމުގައިވެސް ޑީޕާޓްމަންޓް އޮފް ނޭޝަނަލް ރެޖިސްޓްރޭޝަނުން ވަނީ ވިދާޅުވެފައެވެ.

މިހާރު އަމަލުކުރަމުން އަންނަ ގޮތުން، އުމުރުން 18 އަހަރުން މަތީގެ މީހުންނަށް އައިޑީކާޑު ދޫކުރާނީ، އެކާޑުގެ ވެރިފަރާތަށް އެކަންޏެވެ. އެހެން ނަމަވެސް، އުމުރުން 18 އަހަރު ނުފުރޭ ކުޑަކުދިންނާއި، ދާންމަތިވެފައިވާ ބަލި މީހުންގެ އައިޑީކާޑުތައް އެފަރާތެއްގެ ޝަރުޢީ ބަލަދުވެރިންނަށް އެކަމަށް ކަނޑައަޅާފައިވާ އުސޫލުތަކާއި އެއްގޮތަސް އެޑިޕާޓްމަންޓުން އައީ ދޫކުރަމުންނެވެ.

އައިޑީކާޑު ހެއްދުމަށް އޮންލައިންކޮށް ހުށައަޅަންޖެހޭ ގޮތަށް ޚިދުމަތް ފަސޭހަ ކޮށްފައިވާތީ މާލެ ނައިސްވެސް އައިޑިކާޑު ހެއްދުމަށް ހުށައެޅުމަކީ އާއްމު ރައްޔިތުންނަށް ފަސޭހަވެފައިވާ ކަމެކެެވެ. އެހެންނަމަވެސް ކާޑު ނެގުމަށް ކާޑުގެ ވެރިފަރާތުން އެކާޑެއް ދޫކުރުމަށް ކަނޑައަޅާފައިވާ މުައްސަސާއަކަށް ނުވަތަ ޑިޕާޓްމަންޓް އޮފް ނޭޝަނަލް ރެޖިސްޓްރޭޝަނަށް ހާޟިރުވުމަކީ ލާޒިމްކަމެއް ކަމުގައިވާތީ އާއްމު ރައްޔިތުންނަށް އެކަން އޮތީ ދަތި އުނދަގޫކަމަކަށްވެފައެވެ.