ރައްޔިތުން އެދޭ މިސްރާބަށް ރަާއްޖެ އަލުން ގެންދިޔުމަށް އެންމެން އަތުގުޅާލަންވެއްޖެކަމުގައި އެމްޑީޕީގެ ސަރުކާރުގެ ފޮރިން މިނިސްޓަރ ޢަބުދުﷲ ޝާހިދު ވިދާޅުވެއްޖެއެވެ.

ދައުލަތުގެ މުހިއްމު ގިނަ މަޤާމުތަކެއް ފުރުއްވާފައިވާ، އަދި ދައުލަތުން ނިޝާން ޣާޒީގެ ޢިއްޒަތުގެ ވެރިކަމުގެ ލަޤަބު، (ނ.ޣ.ޢ.ވ) އަރުވާފައިވާ، ޝާހިދު މިހެން ވިދާޅުވީ، އެމްޑީޕީން މިހާރު އިއުލާނުކޮށްފައިވާ އެޕާޓީގެ ރައީސަކު ހޮވުމުގެ އިންތިޚާބުގައި އެ މަޤާމަށް އެމަނިކުފާނު ވާދަކުރައްވާނެކަން ހާމަކުރައްވައި، އެކްސްގައި ކުރެއްވި ޕޯސްޓްގައެވެ.

ޢަބުދުﷲ ޝާހިދު ވިދާޅުވީ، އެމް.ޑީ.ޕީ ގެ ރައީސްކަމުގެ މަޤާމަށް ކުރިމަތިލުމަށް ގަސްތުކުރައްވާ ކަމަށާއި، ޕާޓީގެ ލޮބުވެތި މެމްބަރުންގެ ތާއީދާ އެއްބާރުލުން ލިބޭނެ ކަމަށް އުއްމީދު ކުރައްވާ ކަމަށެވެ.  

ޢަބުދުﷲ ޝާހިދަކީ، ރާއްޖޭގެ ސިޔާސީ މައިދާނުގައި ހުންނެވި ތަޖުރިބާކާރު ބޭފުޅެކެވެ. ފޮރިން މިނިސްޓަރުގެ މަޤާާމާއި، ރައްޔިތުންގެ މަޖިލީހުގެ ރައީސްގެ މަޤާމުގެ އިތުރުން، އދ.ގެ އާއްމު މަޖިލީހުގެ ރައީސްކަންވެސް ކުރައްވާފައިވާ ބޭފުޅެކެވެ. ޢަބުދުﷲ ޝާހިދު އެމްޑީޕީއާ ގުޅިވަޑައިގެންނެވީ 2013 ވަނަ އަހަރުގައެވެ.