މުހައްމަދު ތަކުރުފާނުގެ ޖިހާދާއި ގުޅިފައިވާ އުޅަނދު، ކަޅުއޮއްފުމީގެ ނަކަލެއްގެ ގޮތުގައި ބަނދެފައިވާ އޮޑީގެ ބޭރު ހަޑިވުމުން، ސާފު ކުރުމުގެ ބަދަލުގައި ރޮންދާއަޅައި މަށާލައިފިއެވެ.

މިސަރުކާރުން ވަނީ، ކަޅު އޮއްފުންމި މާލެ ގެނެސް، މާލޭ ކަޅުވަކަރު މިސްކިތުގެ ގޯތި ތެރޭގައި އެހެލާފައި ބާއްވާފައެވެ. މީގެ 8 އަހަރު ކުރިން ބަނދެފައިވާ އެއޮޑީގެ ބޭރު ހަޑިވެފައި ވާތީ ސާފު ކުރުމުގެ ބަދަލުގައި ރޮންދާ އާއި ގްރޭންޑަރު އަޅައި މަށާލާފައި ވާތީ، އާޓްސް ކަލްޗަރ އެންޑް ހެރިޓޭޖް މިނިސްޓްރީގެ ކުރީގެ، ސްޓޭޓް މިނިސްޓަރ މުހައްމަދު ޠާރިޤު ވަނީ އެކަމަށް ފާޑު ވިދާޅުވެފައެވެ.

ޠާރިޤު ވިދާޅުވީ، ދިރާސާތައްކޮށް، ވަކި މިންތަކަކަށް ބަނދެފައިވާ އެއުޅަނދު ހަޑިވުމުން، އެ ރީތިކުރުމަށް މަށައިލުމަކީ އެއީ އެކަން ކުރާ ގޮތް ނޫންކަމަށެވެ. އަދި އެއޮޑިއަކީ، ގިނަ ދުވަސް ވާވަރަކަށް އޭގެ މުހިއްމުކަން ބޮޑުވާނެ އެއްޗެއްކަންވެސް ޠާރިޤު ފާހަގަކުރެއްވިއެވެ.

ޠާރިޤަކީ، ކުރީގެ ރައީސް މައުމޫނުގެ ސަރުކާރުގެ ދުވަސްވަރުން ފެށިގެންވެސް ރާއްޖޭގެ ހިރިގަލުގެ މިސްކިތްތަކާއި، ރުއް ނިރޮޅުން އަޅާފައިވާ މިސްކިތްތަކުގެ މަތިވަޑާންތަކާއި އެނޫންވެސް އާސާރީތަކެތި ރައްކާތެރިކުރުމާއި އައުބައުތުރަ ފިލުވުމުގައި މަސައްކަތް ކުރައްވައި، އެކަންކަމުގެ ފަންނީ ތަޖުރިބާ ހޯއްދަވައިގެން ހުންނެވި ބޭފުޅެކެވެ.

ހދ. ނޭކުރެންދޫގައި ބަނދެފައިވާ ކަޅު އޮއްފުންމީގެ ނަކަލު، ފެނަށް ބާލާފައި ވަނީ، 02 ޑިސެމްބަރު 2015 ގައެވެ. އެއޮޑި ބަނދެފައި ވަނީ އިހުގައި ދިވެހިން އޮޑިދޯނި ފަހަރު ބަނދެ އުޅުނު ގޮތަށް، ކުރެދި އިއްޔާއި، ނިރޮޅު ބޭނުންކޮށްގެންނެވެ.