ކުރިއަށްއޮތް ރައްޔިތުންގެ މަޖިލީހުގެ އިންތިޚާބުގައި ވާދަކުރާ ކެންޑިޑޭޓުންގެ މަންދޫބުންނަށްވުމަށް އިލެކްޝަންސް ކޮމިޝަނުން ހުޅުވާލައިފިއެވެ. ކެނޑިޑޭޓުންގެ މަންދޫބަކަށްވުމުގެ ފުރުޞަތު މިމަހުގެ 24 ވަނަ ދުވަހާ ހަމައަށް އިލެކްޝަނުން ވަނީ ހުޅުވާލާފައެވެ.

މިފަހަރުގެ އިންތިޚާބުގައި ކެންޑިޑޭޓުންގެ މަންދޫބުންނަށް ދޫކުރާނީ ޑިޖިޓަލް ފާހެއްކަމަށް އިލެކްޝަންސް ކޮމިޝަނުން ވިދާޅުވިއެވެ. އަދި މަންދޫބުންނަށް ވުމަށް އެދި އީމެއިލް އަދި އިންތިޚާބާ ބެހޭ މަރުކަޒަށް ފޯމް ހުށައެޅޭނެކަމަށް އެ ކޮމިޝަނުން ވިދާޅުވެއެވެ.

އިލެކްޝަންސް ކޮމިޝަނުން ވިދާޅުވީ ކެންޑިޑޭޓުންގެ މަންދޫބަކަށް ވެވޭނީ 18 އަހަރު ފުރިފައިވާ ދިވެހިންނަށްކަމަށެވެ. އަދި ޖިނާއީ ކުށެއްގައި ޙުކުމް ތަންފީޛުކުރަމުންދާ މީހެއް ކަމުގައި ވެގެން ނުވާނެކަމަށާއި، އިންތިޚާބާ ބެހޭ މަސައްކަތެއް ކުރުމަށް އެކޮމިޝަނުން ޙަވާލުވެގެން ހުރި މީހެއް ކަމުގައި ވެގެން ނުވާނެކަމަށެވެ.

މީގެ އިތުރުން ފަނޑިޔާރެއް ނުވަތަ މިނިވަން މުއައްސަސާއެއްގެ މެންބަރެއް ނުވަތަ ވެރިއަކަށް ނުވުމާއި، ދިވެހި ފުލުހެއް ނުވަތަ ސިފައިންގެ މީހަކު ކަމުގައިނުވުމާއި، ކުށެއްގެ ތުޙުމަތުގައި ބަންދުކޮށްފައި ހުރި މީހަކަށް ވެގެން ނުވާނެކަމަށްވެސް އިސީގެ ޝަރުތުތަކުގެ ތެރޭގައިވެއެވެ.

މަންދޫބަކަށްވުމުގެ ޝަރުތުތަކުގެ ތެރޭގައި ސުލޫކީ މިންގަނޑާ ޚިލާފުވެގެން ފިޔަވަޅެއް އަޅައިފައިވާ މީހަކު ކަމުގައިނުވުމާއި އިންތިޚާބީ ކުށެއް ފާއިތުވި 5 އަހަރުދުވަހުގެ ތެރޭގައި ސާބިތުވެފައިވާ މީހަކަށް ކަމުގައިވެސް ވެގެން ނުވާނެއެވެ.

އަންނަ މަހު ބާއްވަން ނިންމާފައިވާ ރައްޔިތުންގެ މަޖިލިސް އިންތިޚާބުގައި 93 ދާއިރާއަކަށް ވާދަކުރުމަށް ހުޅުވާލި ފުރުޞަތުގައި 377 މީހަކު ވާދަކުރެއެވެ. އެމީހުންގެ ނަންތައް މިހާރު ވަނީ ތަރުތީބުކޮށްފައެވެ.