ރައްޔިތުންގެ މަޖިލީހުގެ ޖުމްލަ މެމްބަރުންގެ އަދަދު ގުނުމުގައި މަޖިލީހުގެ ގަވާއިދުގައި ހިމެނި މާއްދާތައް ގަވާއިދުން އުނިކޮށް، މަޖިލީހުގެ މެންބަރަކު މެންބަރުކަމުން ވަކިވުމަށްފަހު އެ ހުސްވި ގޮނޑިއަށް މެންބަރަކު އިންތިހާބު ކުރެވެން ނެތް ހާލަތްތަކުގައި ރައްޔިތުންގެ މަޖިލީހުގެ ޖުމްލަ މެންބަރުންގެ އަދަދު ގުނުމުގައި އެ ހުސްވި ގޮނޑި ނުގުނުމަށް ނިންމައި، އެކަން މަޖިލީހުގެ ގަވާއިދުގެ އެހެން މާއްދާއެއްގައި މަޖިލީހުގެ އާންމު ކޮމިޓީން ހިމަނައިފިއެވެ.

ގާނޫނާ ހިލާފުކަމަށް ބުނާ ތިން މާއްދާއަކީ: 

(ކ) މި ގަވާއިދުގެ ބޭނުމަށްޓަކައި މަޖިލީހުގެ ޖުމްލަ މެންބަރުންގެ އަދަދު ގުނުމުގައި ބަލާނީ އެވަގުތު މަޖިލީހުގެ މެމްބަރުކަމުގައި ދެމިތިބި މެމްބަރުންގެ ޖުމްލަ އަދަދަށެވެ.

(އ) މަޖިލީހުގެ އުމުރު ހަމަވުމުގެ ސަބަބުން ނޫން ގޮތަކަށް އެެއްވެސް އިންތިހާބީ ދާއިރާއެއްގެ ގޮނޑި ހުސްވެއްޖެ ނަމަ، އެ ގޮނޑިއަކަށް މެމްބަރަކު އިންތިހާބުކުރުމާ ހަމަޔަށް މަޖިލީހުގެ ޖުމްލަ އަދަދު ގުނުމުގައި އެ އިންތިހާބީ ދާއިރާއެއް ނުގުނޭނެ އެވެ.

 (ވ) ހިނގަމުންދާ މަޖިލީހުގެ އުމުރެއްގައި ޖުމްލަ މެމްބަރުންގެ އަދަދަށް ބަދަލެއް އައިސްފި ނަމަ، އެންމެ އަވަހަށް ބާއްވާ މަޖިލީހުގެ ޖަލްސާއެއްގައި އެކަން މަޖިލީހުގެ ރައީސް އިއުލާން ކުރަން ވާނެ އެވެ.

އެއާއެކު މަޖިލީހުގެ އާންމު ކޮމެޓީއިން ނިންމީ، ގަވާއިދުގެ 242 މާއްދާއަށް އަކުރެއް އިތުރުކޮށް، މަޖިލީހުގެ ޖުމްލަ މެމްބަރުން ގުނާ އިރު، މަޖިލީހުގެ ހުސްވާ ގޮނޑިއަށް މެމްބަރަކު އިންތިހާބު ކުރަން ގާނޫނުގައި ބުނާ މުއްދަތު ނެތް ނަމަ، ހުސްވެފައިވާ ގޮނޑިއެއް ނުހިމެނޭ ގޮތަށެވެ.

ކޮމެޓީއިން މި ގޮތަށް ނިންމިއިރު، މަޖިލީހުގެ ގަވާއިދުގައި ހިމެނި މާއްދާތައް ގާނޫނު އަސާސީ އާ ހިލާފުކަމަށް ބުނާ މައްސަލަ ސުޕްރީމް ކޯޓުން ވަނީ ބެލުމަށް ނިންމާފައެވެ. މި މައްސަލައިގެ އަޑުއެހުންތައް ތާވަލުކޮށްފައިވަނީ މިމަހުގެ 25 ވަނަ ދުވަހަށެވެ.

އާ ސަރުކާރުގެ މަގާމުތަކަށް އައްޔަންކުރެއްވުމުން މަޖިލީހުގެ ހަތް މެމްބަރަކު އިސްތިއުފާ ދެއްވާފައި ވާއިރު، އާ މެމްބަރުން އިންތިހާބުކުރާނެ މުއްދަތު ނެތުމުން މަޖިލީހުގެ ގަވާއިދަށް މިދިޔަ އަހަރު އިސްލާހު ގެނައީ އެއްވެސް ދާއިރާއެއްގެ ގޮނޑި ހުސްވެއްޖެ ނަމަ އެ ދާއިރާތައް ނުހިމަނައި މެމްބަރުންގެ އަދަދު ގުނާ ގޮތަށެވެ. އެއާ އެކު މަޖިލީހުގެ މި ދައުރުގެ ޖުމްލަ މެންބަރުންގެ އަދަދު 87 އިން 80 އަށް ދަށްވެ އެވެ. އޭރަށް މަޖިލީހުގެ ޖަލްސާތަކުގެ ކޯރަމްގެ އަދަދު ވެސް ވަނީ ދަށްވެފައެވެ.