ކުރިއަށް އޮތް 20 ވަނަ ރައްޔިތުންގެ މަޖިލީހުގެ އިންތިހާބަށް ކުރިމަތިލުމަށް ހުޅުވާލި ފުރުސަތުގައި ފޯމު ހުށަހެޅި ފަރާތްތަކުގެ ތެރެއިން 4 ބޭފުޅެއްގެ ނަން އަނބުރާ ނަންގަވާ، މި އިންތިހާބުގައި ވާދަނުކުރައްވަން ނިންމަވައިފިއެވެ. 

މި މަހުގެ 15 ވަނަ ދުވަހުގެ ނިޔަލަށް މަޖިލިސް އިންތިހާބަށް ކުރިމަތިލުމަށް ދިން ފުރުސަތު ބަންދުވިރު، އީސީގެ ނައިބު ރައީސް އަދި ތަރުޖަމާނު އިސްމާއިލް ހަބީބް ހާމަކުރައްވާފައިވާ ގޮތުގައި، މި އިންތިހާބުގައި ވާދަކުރެއްވުމަށް ހުށަހެޅި ފަރާތްތަކުގެ ތެރެއިން ޝަރުތު ހަމަވެފައިވަނީ 372 ކެންޑިޑޭޓުންނެވެ. އަދި އެއަށްފަހު 4 ބޭފުޅެއްގެ ނަން އަނބުރާ ގެންދެވުމުން، މި އިންތިހާބުގައި ވާދަކުރައްވާނީ ޖުމްލަ 368 ކެނޑިޑޭޓެކެވެ. 

ހަބީބް ވިދާޅުވެފައިވާ ގޮތުގައި ނަން އަނބުރާ ނެންގެވި ކެންޑިޑޭޓުންގެ ތެރޭގައި، ޑިމޮކްރެޓްސްގެ ފަރާތުން ހިތަދޫ މެދު ދާއިރާއަށް ކުރިމަތިލެއްވި، އެ ދާއިރާގެ މިހާރުގެ މެންބަރު އަހްމަދު ރަޝީދު ވެސް ހިމެނި ވަޑައިގަންނަވައެވެ. ދެން ހިމެނެނީ އެމްޑީޕީން މުލަކު ދާއިރާއަށް، ޕީއެންސީން ގައްދޫ ދާއިރާއަށް އަދި އަމިއްލަ ގޮތުން ކިނބިދޫ ދާއިރާއަށް ކުރިމަތިލެއްވި ކެންޑިޑޭޓުންނެވެ.

މިފަހަރު މަޖިލިސް އިންތިހާބުގައި ވާދަކުރައްވާ ކެނޑިޑޭޓުންގެ ތެރޭގައި އެންމެ ގިނައީ އަމިއްލަ ގޮތުން ވާދަކުރައްވާ ކެނޑިޑޭޓުންނެވެ. މި އިންތިހާބުގައި އަމިއްލަ ގޮތުން 130 ކެނޑިޑޭޓަކު ވާދަކުރައްވަން ހުށަހަޅާފައިވާއިރު، އިދިކޮޅު އެމްޑީޕީއިން 90 ދާއިރާއެއްގައި ވާދަކުރެއެވެ. އަދި ސަރުކާރު ހިންގާ ޕީއެންސީ ވާދަކުރަނީ 89 ދާއިރާއަކަށެވެ.