ހުޅުމާލެ 2 ވަނަ ފިޔަވަހީގައި މުދާ އަރުވާ ބޭލުމަށް ވަގުތީ ޖެޓީއެއް ހައުސިން ޑިވެލޮޕްމަންޓް ކޯޕަރޭޝަން، އެޗްޑީސީން ޤާއިމްކޮށްފިއެވެ. އެޗްޑީސީން ބުނީ މިއީ ހުޅުމާލެއަށް މުދާ އަރުވާ ބޭލުމުގެ ދަތިކަން ހުޅުމާލޭގެ ތަރައްޤީގެ މަސައްކަތުގައި އުޅޭ ފަރާތްތަކާއި އެހެނިހެން ވިޔަފާރިކުރާ ފަރާތްތަކަށް ކުރިމަތިވަމުންދާތީ އެކަމަށް ހައްލެއް ހޯދުމަށްޓަކައި ޤާއިމްކުރި ޖެޓީއެއްކަމަށެވެ.

މި ޖެޓީގެ ޙިދުމަތް ބޭނުންވާ ފަރާތްތަކަށް އެޗްޑީސީގެ "މައި ހުޅުމާލެ" ޕޯޓަލް މެދުވެރިކޮށް ޖާގަ ކަށަވަރުކުރުމުގެ އިންތިޒާމް ހަމަޖެހިގެންދާނެކަމަށް އެޗްޑީސީން ވަނީ ބުނެފައެވެ. މި ޖެޓީގެ ޙިދުމަތް 18 ފެބްރުއަރީ އިން ފެށިގެން ލިބޭނެއެވެ. 

ޖެޓީ ބޭނުންކުރުމަށް އެކަމަށް ކަނޑައެޅިފައިވާ ފީއެއް ނަގާނެކަމަށް އެޗްޑީސީން ވަނީ ބުނެފައެވެ. ފީ ކަނޑައަޅާފައިވަނީ އުޅަނދުގެ ކުޑަ ބޮޑުމިނަށް އަދި ހޭދަވާ ވަގުތަށް ބެލުމަށްފަހުގައެވެ. އަގުތައް އުޅެނީ 1400 އިން ފެށިގެން 11000 އާއި ދެމެދުގައެވެ. އެޗްޑީސީން ބުނީ އެ ނޫން ގޮތަކަށް ޖެޓީ ބޭނުންކުރުމަކީ މަނާކަމެއްކަމަށެވެ.