މިއަހަރުގެ ރަމަޟާން މަސް ފެށުމުގެ ކުރިން، މުވައްޒަފުންނަށް ރަމަޟާން މަހުގެ ޢިނާޔަތު ފައިސާ ދިނުމަށް، ލޭބަރ ރިލޭޝަންސް އޮތޯރިޓީން އަންގައިފިއެވެ.

ރަމަޟާންމަހުގެ އިނާޔަތު ފައިސާ އަކީ، ޤާނޫނު ނަމްބަރު، 2/2008، ވަޒީފާ އާއި ބެހޭ ޤާނޫނުގެ 51 ވަނަ މާއްދާގެ (ހ)ގެ ދަށުން، ރާއްޖޭގައި ވަޒީފާ އަދާކުރާ ކޮންމެ ދިވެހި މުވައްޒަފަަކަށް، ވަޒީފާ ދޭ ފަރާތުން ދިނުން ލާޒިމްކޮށްފައިވާ ފައިސާއެކެވެ. މިގޮތުން ރަމަޟާންމަހުގެ ޢިނާޔަތު ފައިސާގެ ގޮތުގައި ރަމަޟާން މަސްފެށުމުގެ ކުރިން، -/3000ރ ދޭންޖެހެއެވެ. 

ލޭބަރ ރިލޭޝަންސް އޮތޯރިޓީން، ރަމަޟާންމަހުގެ އިނާޔަތު ފައިސާ ރަމަޟާމަސް ފެށުމުގެ ކުރިން މުވައްޒަފުންނަށްދޭން އެންގި ނަމަވެސް، އެ އެންގުމާއި އެއްގޮތަށް ދިވެހިން ވަޒީފާގައި ގެންގުޅޭ އަމިއްލަ ކުންފުނިތަކުން މީގެ ކުރީގެ އަހަރުތަކުގައިވެސް ޢަމަލުކޮށްފައި ނުވާކަން އެ އޮތޯރިޓީން ފާހަގަކުރެއެވެ.

މިއަހަރުގެ ރަމަޟާން މަސް ފެށޭނީ، ކަލަންޑަރުގައިވާ ގޮތުން، އަންނަ މާރިޗު މަހުގެ 11 ވަނަ ދުވަހުގައެވެ.