ރާއްޖޭގެ އިޤުތިޞާދީ ހާލަތު އަންނަނީ ކުރިޔަށްވުރެވެސް ބާރަށް ރަނގަޅުވަމުން ކަމުގައި އިކޮނޮމިކް މިނިސްޓަރ، މުޙައްމަދު ސަޢީދު ވިދާޅުވެއްޖެއެވެ.

މިނިސްޓަރ ސަޢީދު މިހެން ވިދާޅުވީ، ރާއްޖޭގެ އިޤުތިޞާދީ ޙާލަތާއި މެދު ބައެއް ފަރާތްތަކުން، ސޯޝަލް މީޑިއާގައި ބައެއް ފަރާތްތަކުން ފަތުރަމުން ގެންދާ ވާހަކަތަކާއި ގުޅިގެން އެކްސްގައި ލިޔުއްވި ޕޯސްޓެއްގައެވެ.

ރާއްޖެ ބަނގުރޫޓުވެއްޖެ ކަމަށާއި، އައިއެމްއެފްގެ ޕްރޮގްރާމްގައި ރާއްޖެއިން ބައިވެރިވާން އުޅޭ ކަމަށް ބުނެ، ސަރުކާރަށް ފާޑުކިޔާ އެކްސް އެކައުންޓަކުން ދަނީ، ވާހަކަތައް ފަތުރަމުންނެވެ.

ރާއްޖޭގެ މާލީ ހާލަތު ގޯސްވަމުންދާކަމަށާއި، މި ދެމަސް ދުވަހަކީ، ރާއްޖެއަށް އިޤުތިޞާދީ ގޮތުން އެންމެ ތަދު ދުވަސްތަކަށް ވާނޭ ކަމުގައި، ކޮޅުމަޑުލުގެ ރަށްތަކަށް ކުރެއްވި ދަތުރުފުޅުގައި ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒު ވިދާޅުވެފައި ވެއެވެ.

ސޯޝަލްމީޑިއާގައި ފަތުރަމުންދާ ވާހަކަތައް ދޮގު ކުރައްވައި މިނިސްޓަރ ސަޢީދު ވިދާޅުވީ، ރާއްޖޭގެމާލީނިޒާމްގެ އިތުބާރުގެއްލުވާލަން ފިލާތިބެ ބަޔަކު މަސައްކަތްކުރަނީ އިންތިޒާރުކުރިގޯސްހާލަތަށް ރާއްޖެވައްޓާނުލެވުމުން ސިޔާސީގޮތުން މާޔޫސްވެގެން ކަމަށެވެ. އަދި އައިއެމްއެފްގެ ޕްރޮގްރާމްގައި ރާއްޖެއިން ބައިވެރިވާން ނުޖެހޭ ކަމުގައިވެސް ސަޢީދު ވަނީ ވިދާުޅުވެފައެވެ.

ކޯވިޑް-19ގެ ހާލަތުގައި ރާއްޖެއަށް ދިމާވި މާލީ ހާލަތުން އަރައިގަނެ އިޤުތިޞާދު ހަމައަކަށް އެޅެމުން ދަނިކޮށް އަނެއްކާވެސް، ރާއްޖެއަށް އިޤުތިޞާދީ ގޮންޖެހުންތަކާއި ކުރިމަތިވެ ޤައުމު ބަނގުރޫޓުވެދާނެ ހާލަތަަކަށް ކަންކަން ގޯސްވަމުންދާކަމަށް ބުނެ މާލީ ދާއިރާގެ ތަޖުރިބާކާރުންވެސް ދަނީ، އަވަސް ފިޔަވަޅުތައް އެޅުމަށް ސަރުކާރަށް ގޮވާލަމުންނެވެ.