ނުކުޅެދުންތެރިކަން ހުންނަ ފަރާތްތަކުގެ ހުނަރާއި ފަންނުވެރިކަން އާންމުންނަށް ދައްކާލާ، އެފަރާތްތައް ބާރުވެރިކުރުމަށް ކުރިޔަށް ގެންދިޔުމަށް ހަމަޖައްސާފައިވާ ރިވެލި ކާނިވާ މިއަދު ހުޅުމާލޭ ސެންޓްރަލް ޕާކުގައި ފަށާނެ ކަމުގައި އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން ވިދާޅުވެއްޖެއެވެ.

އެވުޒާރާއިން ވިދާޅުވާ ގޮތުގައި، ރިވެލި ކާނިވާ ކުރިޔަށް ގެންދިޔުމަށް ހަމަޖައްސާފައި ވަނީ، މިއަދާ މާދަމާ، ހަވީރު 4:00 އިން 6:00 އަދި ރޭގަނޑު 8:00 އިން 10:00 އަށެވެ. މިކާނިވާ ކުރިޔަށް ގެންދާނީ އެޗްޑީސީ އާއި ގުޅިގެން ކަމުގައިވެސް އެވުޒާރާއިން ވިދާޅުވިއެވެ.

ރިވެލި ކާނިވާގައި ކުރިޔަށް ގެންދާނެ ހަރަކާތްތަކުގެ ތެރޭގައި ނުކުޅެދުންތެރިކަން ހުންނަ ފަރާތްތަކުގެ ސްޓޭޖު ހަރަކާތްތަކާއި، މަސައްކަތްތެރިކަން ދައްކާލުމުގެ މަޢުރަޒާއި، އެކި ކުޅިވަރުތަކާއި، މަޢުލޫމާތު ޑެސްކްތަކުގެ ޒަރީޢާއިން ކަމާބެހޭ މަޢުލޫމާތު ދިނުން ހިމެނޭނެ ކަމުގައިވެސް، އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާ ވިދާޅުވެފައިވެއެވެ.

މި ކާނިވާ ބޭއްވުމުގެ މައިގަނޑު މަޤްޞަދުތަކަކީ ނުކުޅެދުންތެރިކަން ހުންނަ ފަރާތްތަކުގެ ހުނަރުވެރިން ފާހަގަކޮށް، މި ހުނަރުވެރިކަމާއި، މަސައްކަތްތެރިކަން ދައްކާލުމަށް ލިބޭ ފުރުޞަތުތައް އިތުރަށް ފުޅާކޮށްދިނުމެވެ. އަދި މިފަދަ އިޖުތިމާޢީ ހަރަކާތެއްގެ ތެރެއިން ނުކުޅެދުންތެރިކަން ހުންނަ ފަރާތްތަކަށް އިތުރު ފުރުޞަތުތަކެއް ހޯދައިދިނުން ހިމެނޭ ކަމަށާއި، މީގެއިތުރުން، މިކާނިވަލުގައި ނުކުޅުދުންތެރިކަން ހުންނަ ފަރާތްތައް އިޤުތިޞާދީ ގޮތުން ބާރުވެރިކުރެވޭނެ މަގު ތަނަވަސް ކޮށްދިނުމަށް، ރާއްޖޭގެ އެކި ކުންފުނިތަކުގައި އެފަދަ ފަރާތްތަކަށް ހުރި ވަޒީފާގެ ފުރުޞަތުތަކާއި ގުޅޭގޮތުން މަޢުލޫމާތު ފޯރުކޮށްދެވިގެންދާނެ ކަމަށާއި، ހަމަ މިއާއެކު ސަރުކާރުގެ އެކި މުއައްސަސާތަކުން ފޯރުކޮށްދޭ ޚިދުމަތްތަކާއި ގުޅުންހުރި މަޢުލޫމާތުތައް އެއްމާޙައުލަކުން ފޯރުކޮށްދިނުމަކީ މި ކާނިވަލުގެ މުހިންމު އެއް މަޤުޞަދު ކަމުގައި އެވުޒާރާއިން ވަނީ ވިދާޅުވެފައެވެ.