ގުޅިފަޅުގެ ބިން ހިއްކުމުގެ މަޝްރޫޢު ހުއްޓާލުމަށް އަންގައި، އިއްޔެ ދިވެހިރާއްޖޭގެ ހައިކޯޓުން ނެރުނު އަމުރުން، ދިވެހިރާއްޖޭގެ ސްޕްރީމްކޯޓަށް އިސްތިއުނާފަށް ހުށައަޅުއްވާނެ ކަމުގައި، ބަންޑާރަ ނައިބު އަޙްމަދު އުޝާމް ވިދާޅުވެއްޖެއެވެ.

އުޝާމް އެކްސްގައި ކުރެއްވި ޕޯސްޓްގައި ވިދާޅުވީ، ގުޅިފަޅު ޕްރޮޖެކްޓަކީ އެތައް ބިލިއަން ރުފިޔާގެ އަގުހުރި ޕްރޮޖެކްޓެއްކަމަށާއި، އަދި ގުޅިފަޅު ބިން ހިއްކުމުގެ %80 ވަރު މިހާރު ނިމިފައިވާއިރު، މިމަސައްކަތް ހުއްޓިފައި އޮންނަ ކޮންމެ ދުވަހަކު ދައުލަތަށް އެތައް މިލިއަން ރުފިޔާގެ ގެއްލުން ވާނެ ދުވަހެއް ކަމަށެވެ. އެހެން ކަމުން، ދައުލަތުގެ ފަރާތުން އެ ނިންމުން ސްޕްރީމް ކޯޓުގައި އިސްތިއުނާފުކުރުމަށް މިހާރު ވާނީ ނިންމާފައި ކަމުގައިވެސް ބަންޑާރަ ނައިބު އަޙްމަދު ޢުޝާމް ވިދާޅުވިއެވެ.

ހައިކޯޓުން ގުޅިފަޅު ބިންހިއްކުމުގެ މަޝްރޫޢު ހުއްޓާލުމަށް އަންގައި ވަގުތީ އަމުރު ނެރެފައި ވަނީ، މިނިސްޓްރީ އޮފް ނޭޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރ އާއި ދެކޮޅަށް، އަމިއްލަ ފަރާތަކުން ސިވިލްކޯޓަށް ހުށައެޅި ވަގުތީ އަމުރާއި ގުޅޭ މައްސަލަ ދިވެހި ރާއްޖޭގެ ހައިކޯޓުގައި އިސްތިޢުނާފް ކުރުމާއި ގުޅިގެންނެވެ.

ގުޅިފަޅު ބިންހިއްކުމުގެ މަޝްރޫޢު ހުއްޓުވުމަށް، ހައުސިންގ މިނިސްޓްރީއާ ދެކޮޅަށް ކޯޓަށް ދިޔައީ، ހ. ޝޭޑީކޯނަރ، ޙުމައިދާ ޢަބްދުލްޤަފޫރެވެ.

މިމައްސަލައަކީ 2021 ވަނަ އަހަރުންފެށިގެން، ސިވިލްކޯޓުގައި ހިނގަމުން އަންނަ މައްސަލައެކެވެ. ސިވިލްކޯޓުން އެމަޝްރޫޢު ހުއްޓުވުމުގެ ވަގުތީ އަމުރެއް ނުދިނުމުން އެމައްސަލަ ޙުމައިދާގެ ފަރާތުން ދިވެހިރާއްޖޭގެ ހައިކޯޓުގައި އިސްތިޢުނާފްކުރީ 2023 ވަނަ އަހަރުގެ މާރިޗު މަހުގެ 15 ވަނަ ދުވަހުގައެވެ. ފަރުތަކުގެ ޙިމާޔަތުގައި ޙުމައިދާ އެދުނު ގޮތަށް ކޯޓުން ވަގުތީ އަމުރެއް ނެރެދީފައި މި ވަނީ، ގާތްގަނޑަކަށް 3 އަހަރު ފަހުންނެވެ. 

ސިވިލްކޯޓަށް ޙުމައިދާ ހުށައަޅުއްވާފައި ވަނީ، ގުޅިފަޅު މަޝްރޫޢުގެ ސަބަބުން ތިމާވެއްޓަށް އިއާދަނުކުރެވޭ ވަރުގެ ބޮޑެތި ގެއްލުންތަކެއް ލިބެމުންދާތީ އެމަޝްރޫޢު ހުއްޓުވުމަށެވެ. ސިވިލްކޯޓުގައި އަދިވެސް އެމައްސަަލަ ނުނިމި ހިނގަމުން އަންނައިރު، ކޯޓުގައި މައްސަލަ އޮތް ނަމަވެސް މިހާތަނަށް ގުޅިފަޅުގެ ބިންހިއްކުމާއި އެތަން ތަރައްޤީ ކުރުމުގެ މަޝްރޫޢުތައް ސަރުކާރުން އައީ ހުއްޓައިނުލައި ކުރަމުންނެވެ.