އިންޑިއަން އޯޝަން އައިލެންޑް ގޭމްސް (އައިއޯއައިޖީ)ގެ އޮގަނައިޒިން ކޮމެޓީ (ސީއައިޖޭ)ގެ ދެވަނަ ނައިބު ރައީސަކަށް މޯލްޑިވްސް އޮލިމްޕިކް ކޮމެޓީގެ ރައީސް މުޙައްމަދު އަބްދުއް ސައްތާރު އަނެއްކާވެސް އިންތިހާބުކޮށްފިއެވެ. 

އައިއޯއައިޖީގެ ސީއައިޖޭގެ ނައިބް ރައީސްގެ މަގާމަށް ސައްތާރު ދެވަނަ ދައުރަކަށް އިންތިހާބުވިކަން އިއުލާންކުރީ ކޮމޮރޯސްގައި ބޭއްވި އެ ކޮމެޓީގެ ބައްދަލުވުމުގައެވެ. މި މަގާމަށް އެންމެ ފުރަތަމަ ސައްތާރު އިންތިހާބުކޮށްފައިވަނީ މީގެ ދެ އަހަރު ކުރިން 2022 ވަނަ އަހަރުއެވެ. އޭރުވެސް ސައްތާރު ހުރީ އޮލިމްޕިކްސް ކޮމެޓީގެ ރައީސްގެ މަގާމުގައެވެ. އޮލިމްޕިކްސް ކޮމެޓީގެ ރައީސްގެ މަގާމާއި ސައްތާރު ހަވާލުވީ 2021 ވަނަ އަހަރުއެވެ.

އައިއޯއައިޖީގެ ސީއައިޖޭގެ ނައިބް ރައީސްގެ މަގާމަށް ދެވަނަ ދައުރަކަށް ސައްތާރު އިންތިހާބުވުމާ ގުޅިގެން މޯލްޑިވްސް އޮލިމްޕިކްސް ކޮމެޓީއިން ވަނީ ސައްތާރަށް މަރުހަބާ ކިޔާފައެވެ. އިތުރަށް ހާމަކޮށްފައިވާ ގޮތުގައި، އެ ކޮމެޓީއިން އުއްމީދުކުރަނީ ސީއައިޖޭ އާއި ގުޅިގެން އިންޑިއަން އޯޝަން ސަރަހައްދުގައި ހިމެނޭ ގައުމުތަކުގައި ކުޅިވަރު އިތުރަށް ކުރިއަރައިގެން ދާނެ ކަމަށެވެ.