ސްކޫލްކުދިންނަށް ނަފްސާނީ ފުރަތަމަ އެހީ ފޯރުކޮށްދިނުމުގެ ގޮތުން 1484 ހެލްޕްލައިނެއް ޤާއިމްކޮށްފިއެވެ. 

މިއަދު ހ. މީރުމާގައި ބޭއްވި ރަސްމިއްޔާތުގައި މިހެލްޕްލައިން އިފްތިތާޙްކޮށްދެއްވީ، ރައީސުލްޖުމްހޫރިއްޔާގެ އަނބިކަނބަލުން ފަޒްނާ އަޙްމަދެވެ.

މިނިސްޓްރީ އޮފް އެޑިޔުކޭޝަނުން ހާމަކުރައްވާފައިވާ ގޮތުގައި، 1484 ހެލްޕްލައިންގެ ޚިދުމަތް ރަސްމީކޮށް ފެށުމަށް ހަމަޖައްސާފައި ވަނީ ޖޫން މަހުގެ 18 ވަނަ ދުވަހުން ފެށިގެންނެވެ. މިހެލްޕްލައިންގެ ޚިދުމަތް ލިބެމުންދާނީ، ހުކުރުދުވަސް ފިޔަވައި ބަންދުނޫން ދުވަސްތަކުގައި މެންދުރުފަހު 3:00 އިން ރޭގަނޑު 9:00އަށެވެ.

އެޑިޔުކޭޝަން މިނިސްޓްރީގެ އިސްނެގުމާއި އެކު މި ހެލްޕްލައިން ޤާއިމްކޮށްފައި ވަނީ، ޔުނިސެފާއި، ޑަބްލިޔުއެޗްއޯ އަދި ދިވެހި ރެޑްކްރެސެންޓްގެ އެހީތެރިކަމާއި އެކުގައެވެ.

ރާއްޖޭގެ ސްކޫލު މަދަރުސާތަކުގައި ކިޔަވާކުދިންނަށް ދިމާވާ ނަފްސާނީ މައްސަލަތަކަށް އެހީތެރިވެ ދިނުމުގެ ގޮތުން މިއީ މިފަދަ ހެލްޕްލައިނެއް ޤާއިމް ކުރެވުނު ފުރަތަމަ ފަހަރެވެ.