ކުރީ ސަރުކާރުން އިއުލާނުކުރުި ގެދޮރުވެރިޔާ ހައުސިންގ ސްކީމްގެ ތެރެއިން ފުލެޓް ދިނުމަށް ކަނޑައެޅި 4000 މީހުންގެ ތެރެއިން، ޝަރުތު ފުރިހަމަވާ މީހުންކަމަށް އޭސީސީން ކަނޑައެޅި މީހުންނަށް އަންނަ ހަފްތާގައި، ފްލެޓް ދޫކުރުމުގެ މަސައްކަތް ފައްޓަވާނެ ކަމުގައި ހައުސިންގ މިނިސްޓަރު ކަމުގެ މަޤާމަށް ރައީސުލްޖުމްހޫރިއްޔާ ޢައްޔަނުކުރައްވާފައިވާ، ޑރ. ޢަލީ ހައިދަރު ވިދާޅުވެއްޖެއެވެ.

އެމަނިކުފާނު މިހެންވިދާޅުވީ، ފްލެޓް މައްސަލަ އާއި ގުޅިގެން، ހައުސިންގ މިނިސްޓަރާއި އެމިނިސްޓްރީގެ ބޭފުޅުން، ރައްޔިތުންގެ މަޖިލީހުގެ ޤައުމީ ތަރައްޤީއާ ތަރިކައިގެ ކޮމިޓީއަށް ހާޟިރުވެވަޑައިގެން ދެއްކެވި ވާހަކަފުޅުގައެވެ.

ހައުސިންގ މިނިސްޓަރ ޢަލީ ހައިދަރު ވިދާޅުވީ ސަރުކާރު ބަދަލުވިއިރު، ގެދޮރުވެރިޔާ ފްލެޓް ދޫކުރުމުގެ މަސައްކަތް އޭސީސީން އޮތީ ހުއްޓުވާފައި ކަމަށެވެ.

ހައުސިން މިނިސްޓަރ ވިދާޅުވީ، މިހާރު މަސައްކަތް ކުރައްވަމުން ދަނީ އޭސީސީން ފޮނުވާފައިވާ ލިސްޓުގައިވާ ފަރާތްތައް ދެނެގަތުމުގެ މަސައްކަތް ކަމަށާއި، މަސައްކަތްކުރައްވަމުން ދަނީ ވީހާވެސް އަވަހަކަށް ޝަރުޠު ހަމަވި މީހުންނަށް ފްލެޓްތައް ދޫކުރުމުގެ މަސައްކަތް ފެށޭތޯ ކަމުގައި މިނިސްޓަރ ހައިދަރު ވިދާޅުވިއެވެ.

މީގެ އިތުރުން މިނިސްޓަރ ހައިދަރު ވިދާޅުވީ، ކުރީ ސަރުކާރުން ޝަރުޠު ހަމަވާކަމަށް ކަނޑައެޅި %59 އިންސައްތަ މީހުންނަކީ، ޝަރުޠު ހަމަނުވާ މީހުންކަމުުގައި އޭސީސީން ކަނޑައަޅުއްވާފައިވާކަމަށާއި، މެޖޯރިޓީއަށް ވުރެ ބޮޑު އަދަދެއް ޝަރުޠު ހަމަނުވުމަކީ އޮތް ކަންބޮޑުވުމެއް ކަމަށެވެ. އެހެންކަމުން އެކަން ބައްލަވައި ރީޗެކް ކުރައްވާނެ ކަމުގައި މިނިސްޓަރ ހައިދަރު ވިދާޅުވިއެވެ. 

ކުރީސަރުކާރުގައި ގެދޮރުވެރިޔާ ބޯހިޔާވަކަމުގެ ސްކީމުގެ ދަށުން، އެންމެ ފުރަތަމަ ދޫކުރަން ނިންމި، 4000 ފްލެޓް ލިބޭ ފަރާތްތަކާއިއެކު ކުރީ ސަރުކާރުން އެގްރީމެންޓްތައްވެސް އޮތީ ހަދާފައެވެ.