ދިވެހި ރާއްޖޭގެ ޤައުމީ ދިފާޢީ ބާރުގެ ފަޚުރުވެރި 131 ވަނަ ސިފައިންގެ ދުވަސް ފާހަގަކޮށްފިއެވެ.

ސިފައިންގެ ދުވަސް ފާހަގަކުރުމުގެ ގޮތުން ބާއްވާ ފުރަތަމަ ހަރަކާތެއްގެ ގޮތުގައި މިއަދު ކުރިޔަށް ގެންގޮސްފައި ވަނީ، ދިދަނެގުމެވެ. މިގޮތުން ދިދަ ނެގުމުގެ ރަސްމިއްޔާތު ބާއްވާފައި ވަނީ، ސިފައިންގެ މަރުކަޒު ކަޅުތުއްކަލާ ކޮށީގައެވެ. 

މިއަދު ހެނދުނު 0600 ގައި ކަޅުތުއްކަލާ ކޮށީގައި ބޭއްވި މި ޚާއްޞަ ރަސްމިއްޔާތު ޝަރަފުވެރިކޮށްދެއްވީ ދިފާޢީ ވަޒީރު އަލްއުސްތާޛާ މާރިޔާ އަޙްމަދު ދީދީ އެވެ. މީގެ އިތުރުން، އަތޮޅުތަކުގައި ހުރި ސިފައިންގެ މަރުކަޒުތަކުގައިވެސް މިއަދު ވަނީ، ދިދަ ނެގުމުގެ ރަސްމިއްޔާތު ބާއްވާފައެވެ.

މި ރަސްމިއްޔާތުގައި ދިފާޢީ ވަޒީރު ވަނީ ސިފައިންގެ 131 ވަނައަހަރު ބޭނުންކުރުމަށް ކަނޑައަޅާފައިވާ ޝިޢާރު، "ސިފައިންގެ ބަދަހިކަން - ޤައުމުގެ ހަމަޖެހުން" ވަނީ އިޢުލާން ކޮށްދެއްވާފައެވެ. މީގެއިތުރުން ދިވެހި އަސްކަރިއްޔާއިން އަހަރަކު ދެފަހަރު ނެރެމުން އަންނަ "އައްޑަނަ މަޖައްލާ" ގެ 33 ވަނަ ޢަދަދު ވެސް ނެރެދެއްވީ، ދިފާޢީ ވަޒީރު އަލްއުސްތާޛާ މާރިޔާ އަޙްމަދު ދީދީ އެވެ.

މީގެ އިތުރުން ސިފައިންގެ އަހަރީ ދުވަސް ފާހަގަކުރުމުގެ ހަރަކާތްތަކުގެ ތެރެއިން، ކޮންމެ އަހަރަކުވެސް ބާއްވަމުން އަންނަ ސިފައިންގެ "ޝަރަފްގެ ހިނގާލުން" މިއަދު ވަނީ މާލޭގެ ބޮޑެތި މަގުތަކުގައި ކުރިޔަށް ގެންގޮސްފައެވެ.