ރައްޔިތުންގެ މަޖިލީހުގެ އިންތިޚާބަށް ކެންޑިޑެންސީ ހުށައެޅުމުގެ ސުންގަޑި ކައިރިވަމުން އަންނައިރު، މަޖިލީހުގެ އިންތިޚާބުގައި އަމިއްލަ ގޮތުން ވާދަކުރައްވާ ފަރާތްތަކުންވެސް ދަނީ ކެންޑިޑެންސީ ހުށައަޅަމުންނެވެ. އޭގެ ތެރޭގައި ޕާޓީތަކުން ކެންޑީޑެންސީ ހުށައަޅާ ކެންޑިޑޭޓުން ގިނައެވެ. އެހެން ނަމަވެސް މިފަހަރު، މަޝްހޫރު ބައެއް ސިޔާސީ ބޭފުޅުން، މިނިވަން ކެންޑިޑޭޓުންގެ ގޮތުގައި ރައްޔިތުންގެ މަޖިލީހުގެ އިންތިޚާބަށް ކުރިމަތި ލެއްވުމަށް ނިންމަވާފައިވެއެވެ.

2008 ވަނަ އަހަރު ޕާޓީ ސިޔާސަތު ތަޢާރަފްވެ 2009 ވަނަ އަހަރު ބޭއްވި ރައްޔިތުންގެ މަޖިލީހުގެ އިންތިޚާބުގައިވެސް، ގޮނަ ގޮނޑިތައް ހޯއްދެވީ، ޕާޓީގެ ޓިކެޓުގައި އިންތިޚާބުގައި ވާދަކުރެއްވި ކެންޑިޑޭޓުންނެެވެ.

އެމްޑީޕީގެ އާއްމު މެމްބަރުންނާއި ސިޔާސީ ޕާޓީތަކުގެ އާއްމު މެމްބަރުންގެ ރޫޙް އޭރު މީގެ 15 ވަރަކަށް އަހަރު ކުރިން ހުރީ އެގޮތަށެވެ.  އެހެން ނަމަވެސް މިހާރު މަޑުމަޑުން އެކަން ވަނީ ބަދަލުވާން ފަށާފައި ކަމަށް ބެލެވެއެވެ.

ސިޔާސީ ދާއިރާގެ ފުންނާބު އުސްބޭފުޅުންނާއި، ސިޔާސީ ދާއިރާ ތަޖުރިބާ ކުރައްވަމުން ގެންދަވާ ބޭފުޅުން ވިދާޅުވާ ގޮތުގައި، ރައްޔިތުންގެ މަޖިލީހުގެ އިންތިޚާބު ކާމިޔާބު ކުރުމަށް އެންމެ ޔަޤީން ގޮތަކީ، ޕާޓީ ޓިކެޓެއްގައި އިންތިޚާބަށް ނުކުތުމެވެ.

ރައްޔިތުންގެ މަޖިލީހުގެ އިންތިޚާބުގައި މިފަހަރު އަމިއްލަ ގޮތުން، މަޝްހޫރު ސިޔާސީ ބޭފުޅުން ވާދަ އެބަ ކުރައްވައެވެ. އޭގެ ތެރޭގައި. ރައްޔިތުންގެ މަޖިލީހާއި ރައްޔިތުންގެ ޚާއްޞަ މަޖިލީހުގައި، ގޮނޑި ފުރުއްވި، ރައްޔިތުންގެ މަޖިލީހުގެ ވިލުފުށީ ދާއިރާގެ ކުރީގެ މެމްބަރު ރިޔާޒު ރަޝީދު ހިމެނިވަޑައިގަންނަވައެވެ. އަދި ކުރިން ޕީޕީއެމްގެ ޓިކެޓްގައި ދިއްގަރު ދާއިރާގެ ގޮނޑި ކާމިޔާބު ކުރެއްވި، ފާރިޝް މައުމޫންވެސް މިފަހަރު އަމިއްލަ ގޮތުން ނުކުމެވަޑައިގެންނެވީ، ރައްޔިތުންގެ މަޖިލީހުގެ މައްޗަންގޮޅި ދެކުނު ދާއިރާއަށެވެ. ފާރިޝްވަނީ، ރިޔާސީ އިންތިޚާބުގައިވެސް މިނިވަން ކެންޑިޑޭޓެއްގެ ގޮތުގައި ވާދަކުރައްވާފައެވެ.

ކުރީގެ ހެލްތު މިނިސްޓަރ ޢަބުދުﷲ އަމީން، އަމިއްލަ ގޮތުން، އުނގޫފާރު ދާއިރާއަށް ވާދަކުރެއްވުމަށް ނިންމެވިކަން އިއްޔެ ވަނީ އިއުލާނު ކުރައްވާފައެވެ. ނިމިިިޔަ އެމްޑީޕީގެ ވެރިކަމުގައި ރައީސުލްޖުމްހޫރިއްޔާގެ އޮފީހުގެ ޗީފް އިފް ސްޓާފްގެ މަޤާމުގައި ހުންނެވި، ޢަލީ ޒާހިރު ވަނީ ރައްޔިތުންގެ މަޖިލީހުގެ ފެލިދޫ ދާއިރާއަށް ވާދަކުރެއްވުމަށް ނިންމަވައި މިނިވަން ކެންޑިޑޭޓެއްގެ ގޮތުގައި ފޯމް ހުށައަޅުއްވާފައެވެ. ޢަލީ ޒާހިރަކީ، އަދާލަތު ޕާޓީގެ އިސް މަޤާމުތަކެއް ފުރުއްވާފައިވާ ބޭފުޅެެކެވެ.

މިފަހަރުގެ ރިޔާސީ އިންތިޚާބަށް އަމިއްލަ ގޮތުން ނުކުންނަވާ އެންމެ ގިނަ ބޭފުޅުންނަކީ، މިހާރު ސަރުކާރާއި ރައީސް ޔާމީނާއި ދެމެދު އުފެދިފައިވާ ޚިޔާލު ތަފާތުވުންތަކުގައި، ރައީސް ޔާމީނުގެ ތާއީދާއިއެކު ރައްޔިތުންގެ މަޖިލީހުގެ އިންތިޚާބުގައި ވާދަކުރެއްވުމަށް ނުކުންނަވާ ބޭފުޅުންނެވެ.

ރައީސް ޔާމީނުގެ ތާއީދާއި އެކު މަޖިލިސް އިންތިޚާބުގައި، ވާދަކުރައްވާ ކެންޑިޑޭޓުންގެ ކެންޑީޑެންސީ ހުށައެޅުން މިއަދު 13:00ގައި އޮންނާނެ ކަމަށް، ރައީސް ޔާމީން އުފައްދަވާ ޕީއެންއެފްގެ ހަރަކާތްތަކުގައި އެންމެ އިސްކޮށް ހަރަކާތްތެރިވާ ފަރާތްތަކުން ވަނީ ވިދާޅުވެފައެވެ.

ރައީސް ޔާމީންގެ ފަރާތްޕުޅުން ރައްޔިތުންގެ މަޖިލީހަށް ވާދަކުރެއްވުމަށް ކެންޑިޑެންސީ ހުށައަޅުއްވާ ފަރާތްތަކުގެ ތެރޭގައިވެސް ސިޔާސީ ދާއިރާގެ މަޝްހޫރު އަދި ނަންހުރި ބޭފުޅުން ހިމެނޭނެއެވެ.

ރާއްޖޭގެ އިދާރީ ދާއިރާތަކަށް ބަލާއިރު، ބައެއް ޕާޓީތަކަށް ބައެއް ދާއިރާތަކަކީ އާދަޔާޚިލާފަށް ތާއީދު ބޮޑު ދާއިރާތަކެވެ. މިގޮތުން ރައްޔިތުންގެ މަޖިލީހުގެ 4 ދާއިރާއަކަށް އެމްޑީޕީން ކުރިމަތިލާފައި ނުވާއިރު އެދާއިރާތަކަކީ، މީގެ ކުރިން ޕީޕީއެމްގެ ތާއީދު ވަރަށް ބޮޑު ދާއިރާތަކެވެ. އެދާއިރާތަކަށް ޕާޓީލައިނަށް ވުރެ ގިނަ ބޭފުޅުން ނުކުންނަވަނީ، މިނިވަން ކެންޑިޑޭޓުންގެ ގޮތުގައެވެ.