އައު ޤާނޫނު އަސާސީއަށް ޢަމަލުކުރަން ފެށުމުގެ ކުރިން، ޢަމަލުކުރަމުން އައި، ވަޒީރުންނާއި ސުވާލު ކުރުމުގެ ޤާނޫނު އުވާލުމަށާއި، މަޖިލީހުގެ ޤަވާއިދުގެ ތެރެއިން ރައީސުލްޖުމްހޫރިއްޔާ އާއި އެމަނިކުފާނުގެ ނައިބު އަދި ވަޒީރުންވެސް މަޖިލީހަށް ހާޟިރުކޮށް ސުވާލު ކުރެވޭނެ ގޮތް ހެއްދެވުމަށް، ރައްޔިތުންގެ މަޖިލީހުގެ ނައިބު ރައީސް އަދި ހޯރަފުށީ ދާއިރާގެ މެމްބަރު އަޙްމަދު ސަލީމް ހުށައަޅުއްވައިފިއެވެ.

ސަލީމް މަޖިލީހަށް ހުށައެޅުއްވި، ޤާނޫނު ނަންބަރު 2/2005 (ވަޒީރުންނާ ސުވާލުކުރުމުގެ ޤާނޫނު) އުވާލުމުގެ ބިލުގެ އިބްތިދާއީ ބަހުސް މިއަދު އޮތް ރައްޔިތުންގެ މަޖިލީހުގެ ޖަލްސާގައި ވަނީ ކުރިޔަށް ގެންދަވާފައެވެ. މިބިލުގެ ފުރަތަމަ ކިޔުން އިއްވާފައި ވަނީ، ހުސްވި އަހަރުގެ ޑިސެމްބަރު މަހުގެ 28 ވަނަ ދުވަހު ބޭއްވި ރައްޔިތުންގެ މަޖިލީހުގެ ޖަލްސާގައެވެ.

ބިލު މަޖިލީހަށް ހުށައަޅުއްވައި ދެއްވަމުން، މަޖިލީހުގެ ނައިބު ރައީސް އަދި ހޯރަފުށީ ދާއިރާގެ މެމްބަރު އަޙްމަދު ސަލީމް ވިދާޅުވީ، ވަޒީރުންނާ ސުވާލުކުރުމުގެ ޤާނޫނަކީ، މިހިނދަށް ބޭނުމެއް އޮތް ޤާނޫނެއް ނޫން ކަމަށެވެ. އެޤާނޫނު އުވާލުމަށް ހުށައަޅުއްވަނީ އެހެންވެ ކަމަށާއި، ޤާނޫނު އަސާސީގެ 98 ވަނަ މާއްދާގައި، އޮންނަ ގޮތުން ސުވާލު ކުރުމުގެ ބާރު ދީފައި އޮންނަނީ މަޖިލީހުގެ ޤަވާއިދުގައިވާ ގޮތުގެ މަތިން ކަމަށެވެ.

ސަލީމް ވިދާޅުވީ، ވަޒީރުންގެ މަޖިލިސް އެކުލެވިގެންވަނީ ހަމައެކަނި ވަޒީރުންގެ މައްޗަށް ނޫންކަމަށާއި، ރައީސުލްޖުމްހޫރިއްޔާ އާއި އެމަނިކުފާނުގެ ނައިބުވެސް މަޖިލީހަށް ޖަވާބުދާރީވެވަޑައިގަންނަވަން ޖެހޭނެ ކަމަށެވެ.

ސަލީމް ވިދާޅުވީ، ރައީސުލްޖުމްހޫރިއްޔާ އާއި އެމަނިކުފާނުގެ ނައިބު ރައްޔިތުންގެ މަޖިލީހަށް ޖަވާބުދާރީވާން ޖެހޭ ގޮތަށް މަޖިލީހުގެ ޤަވާއިދުގައި އިޖުރާއަތްތައް ހިމަނަން ޖެހޭނެ ކަމަށެވެ. އަދި ދުނިޔޭގެ އެހެން ޤައުމުތަކުގައިވެސް އެޤައުމުތަކުގެ ރައީސުން މަޖިލީހަށް ޖަވާބުދާރީވެވަޑައިގަންނަވާ ކަމުގައި ސަލީމް ވިދާޅުވިއެވެ.