ކުރާނެ މަސައްކަތެއް ނެތިގެން ރައްޔިތުންގެ މަޖިލީހުގެ މިއަދުގެ ޖަލްސާ ކުރުކޮށްލައިފި
ރައްޔިތުންގެ މަޖިލީހުގެ ޖަލްސާގައި މިއަދު ކުރާނެ އިތުރު މަސައްކަތެއް ނެތުމާއި އެކު، ޖަލްސާ ކުރުކޮށްލައްވައިފިއެވެ.
މިއަދު ހެނދުނު ފެށި ޖަލްސާ ދެމިގެން ދިޔައީ ދޮޅުގަޑި އިރަށެވެ. ޖަލްސާ ނިންމަވާލެއްވިކަން ރިޔާސަތުން އިޢުލާނު ކުރެއްވީ ހެނދުނު 10:45 ގައެވެ.
ޖަލްސާ ނިންމަވާލައްވަމުން ރައްޔިތުންގެ މަޖިލީހުގެ ރައީސް މުޙައްމަދު އަސްލަމް ވިދާޅުވީ، ރައްޔިތުންގެ މަޖިލީހުގެ މިއަދު ޖަލްސާގައި ކުރާނެ އިތުރު މަސައްކަތެއް ނެތްކަމަށާއި ދެން މަޖިލީހުގެ ޖަލްސާއެއް ބާއްވަވާނީ، މާދަމާ ހެނދުނު ކަމަށެވެ.
ރައްޔިތުންގެ މަޖިލީހުގެ ޖަލްސާގެ އެޖެންޑާގައި މިއަދު ހިމަނާފައިވާ ކަންކަމުގެ ތެރެއިން، ދާންދޫ ދާއިރާގެ މެމްބަރު ޔައުޤޫބު ޢަބުދުﷲ ފިޝަރީޒް މިނިސްޓަރ އަޙްމަދު ޝިޔާމާއި ކުރައްވާ ސުވާލު ކުރެއްވުމާއި، އައްޑޫ މީދޫ ދާއިރާގެ މެމްބަރު ރޮޒައިނާ އާދަމް ހުށައެޅުއްވި ޤަރާރުގެ ފުރަތަަމަ އިއްވުން ކުރިޔަށް ގެންދެވިއެވެ.
މީގެ އިތުރުން ހޯރަފުށީ ދާއިރާގެ މެންބަރު އަދި މަޖިލީހުގެ ނައިބު ރައީސް އަޙްމަދު ސަލީމް ހުށައަޅުއްވާފައިވާ، ވަޒީރުންނާއި ސުވާލުކުރުމުގެ ޤާނޫނު އުވައިލެއްވުމުގެ ބަހުސް ކުރިޔަށް ގެންދިޔައެވެ.
ރައްޔިތުންގެ މަޖިލީހުގެ މިއަދުގެ ޖަލްސާއަށް ހާޟިރުވީ ވަރަށް މަދު މެމްބަރުންނެވެ.