ސަރުކާރުގެ މަސްކުންފުނި، މިފްކޯއަށް މަސްގަންނަ އަގު 20ރ އަށްކުޑަކޮށްފިއެވެ.

މިއަދު އޮތް ރައްޔިތުންގެ މަޖިލީހުގެ ޖަލްސާގައި ވަޒީރުންނާއި ސުވާލުކުރުމުގެ ވަގުތުގައި ދާންދޫ ދާއިރާގެ އެމްޑީޕީގެ މެންބަރު ޔައުގޫބް އަބްދުﷲ ކުރެއްވި ސުވާލަށް ޖަވާބު ދެއްވަމުން، ފިޝަރީޒް މިނިސްޓަރ އަޙްމަދު ޝިޔާމް ވިދާޅުވީ، މަސް ގަންނަ އަގު ދަށްކުރީ، މިފްކޯއަށް ލިބެމުން އަންނަ ގެއްލުންތައް ފޫބެއްދުމަކަށް ކަމަށެވެ. މިގޮތުން ރާއްޖެއިން ބޭރުގެ މާކެޓްތަކަށް، ވިއްކޭ އެންމެ މަތީއަގަކީ، 22.40ރ ކަމަށް ވާއިރު، 25ރ އަށް މަސްކިލޯއެއް ގަނެގެން ދެކޮޅު ޖެއްސެން ނެތްކަމުގައި ޝިޔާމް ވިދާޅުވިއެވެ.

ރައީސުލްޖުމްހޫރިއްޔާ، އިބްރާހީމް މުޙައްމަދު ޞާލިޙްގެ ވެރިކަމުގެ ފަހުކޮޅު މަސްކިލޯއެއް ގަންނަ އަގު، 25ރ ބޮޑު ކުރީ، ސިޔާސީ ބޭނުމަށް ކަމަށެވެ. އަދި އެއަގުގައި މަސްގަތުމަށް ސަރުކާރުން ސަބްސިޑީގެ ގޮތުގައި، 1.1 ބިލިއަން ރުފިޔާ ޚަރަދު ކުރަންޖެހޭ ކަންވެސް ޝިޔާމް ފާހަގަކުރެއްވިއެވެ.

މަސްވެރިން އަތުން މަސްގަންނަ އަގު މިސަރުކާރުން، 20ރއަށް ދަށްކުރި އިރު މަސްވެރިންނަށް ދޭންޖެހޭ ފައިސާ ނުދެވި ލަސްވާ މައްސަލައިގައި މަސްވެރިން ދަނީ ސަރުކާރަށް ފާޑުކިޔަމުންނެވެ.