ސޭޝެލްސްގެ ރައީސްގެ ދެކަނބަލުން މިހާރު ރާއްޖެއަށް ކުރައްވަމުންގެންދަވާ ރަސްމީ ދަތުރުފުޅުެގެ ތެރެއިން، ދެ ޤައުމުގެ މެދުގައި މަތީފެންވަރުގެ ރަސްމީ މަޝްވަރާތައް މިއަދު ބާއްވައިފިއެވެ.

މިބައްދަލުވުން އޮތީ މިއަދު މެންދުރުކުރީގައި ރައީސުލްޖުމްހޫރިއްޔާގެ އޮފީހުގައެވެ. 

މި ބައްދަލުކުރެއްވުމުގައި ރައީސުލްޖުމްހޫރިއްޔާއާ ސޭޝެލްސްގެ ރައީސް ވަނީ ދެ ޤައުމުގެ ދެމެދު އޮންނަ ގުޅުމުގެ މައްޗަށް އަލިއަޅުވާލައްވައި ވާހަކަފުޅު ދައްކަވާފައެވެ. އަދި ސޭޝެލްސްގެ ރައީސް ރާއްޖެއަށް ކުރެއްވި ފުރަމާނަ ދަތުރުފުޅަކީ އެޤައުމުގެ އިސްވެރިއަކު ރާއްޖެއަށް ކުރެއްވި ފުރަތަމަ ދަތުރުފުޅުކަމުގައިވާތީ މިއީ ވަރަށް ތާރީޚީ ދަތުރުފުޅެއްކަން ފާހަގަކުރެއްވިއެވެ. ރައީސުލްޖުމްހޫރިއްޔާ ދެއްކެވި ވާހަކަފުޅުގައި އެމަނިކުފާނު 2019 ވަނަ އަހަރު ސޭޝަލްސްއަށް ކުރެއްވި ދަތުރުފުޅުގެ ހަނދާންތައް އާ ކުރައްވަމުން އެދަތުރުފުޅަކީ ދެޤައުމުގެ ގުޅުން އިތުރަށް ބަދަހިވެގެންދިއުމަށް ކުރިއަށް އެޅިގެންދިޔަ ފިވަޅެއްކަން ފާހަގަކުރެއްވިއެވެ.

ދެބޭފުޅުންގެ ވާހަކަފުޅުގައި ދެ ޤައުމުގެ ގުޅުންތަކުގައި މިހާރު ގުނަމުންދަނީ މިދަނީ މުޅިން އާޒަމާނެއްކަން ފާހަގަކުރައްވައި ކުރިޔަތް އޮތް ދުވަސްތަކުގައި ދެޤައުމުގެ ގުޅުންތައް އިތުރަށް ބަދަހިވެ ކުރިއަރައިގެންދާނެކަން ވަނީ ފާހަގަކުރައްވާފައިވެއެވެ. އަދި ދެބޭފުޅުން ވަނީ ކުރިމަގުގައި ދެޤައުމުން އިސްކަންދޭ އެކިދާއިރާތަކުން ކުރެވިދާނެ ކަންކަމާ ގުޅޭގޮތުން މަޝްވަރާކުރައްވާފައެވެ.

ދެޤައުމުގެ ދެމެދު ބޭއްވެވި ރަސްމީ ވާހަކަތައް ނިންމަވާލައްވަމުން ދެ ބޭފުޅުން ވަނީ ދެ ޤައުމުގެ ގުޅުންތައް އިތުރަށް ބަދަހިކުރެއްވުމަށް މަސައްކަތް ކުރައްވާނެކަމުގައި ވިދާޅުވެފައެވެ. ދެޤައުމުގެ ދެމެދު ބޭއްވުނު ރަސްމީ ވާހަކަތަކުގެ ކުރިން ދެބޭފުޅުން ވަނީ ވަކިން ބައްދަލުކުރައްވައި ވެސް މަޝްވަރާކުރައްވާފައެވެ.