ރައްޔިތުންގެ މަޖިލީހުގެ އުމުރުން، މިހާރު 92 އަހަރުވެފައި ވީނަމަވެސް، ޤާބިލްކަމުގެ ގޮތުން ބަލާއިރު އަދިވެސް މަޖިލިސް އޮތީ ވަރަށް ޅަފަތުގައި ކަމަށް، ރައްޔިތުންގެ މަޖިލީހުގެ ނައިބު ރައީސް އަދި ރައްޔިތުންގެ މަޖިލީހުގެ ހޯރަފުށީ ދާއިރާގެ މެމްބަރު އަޙްމަދު ސަލީމް ވިދާޅުވެއްޖެއެވެ.

ސަލީމް މިހެން ވިދާޅުވީ، ރައްޔިތުންގެ މަޖިލީހާއި ޑަބްލިއު އެފް ޑީ ގުޅިގެން ރައްޔިތުންގެ މަޖިލީހުގެ އިދާރާގެ ކޮމިޓީ އެންޑް ރިސަރޗް ސެކްޝަންގެ މަސައްކަތް ޑިޖިޓަލް ކުރުމަށް ތައްޔާރުކުރި ޑިޖިޓަލް ޑޭޓާބޭސް އިފްތިތާޙްކޮށްދެއްވައި ދެއްކެވި ވާހަކަފުޅުގައެވެ.

ސަލީމް ވިދާޅުވީ، ޤާބިލްކަމުގެ ގޮތުން މަޖިލިސް އަދިވެސް އޮތީ ވަރަށް ޅަފަތުގައި ކަމަށާއި، އުމުރާއި އެއްވަރަށް މަޖިލިސް ކުރިއަރައި ނުދާކަމަށެވެ. އަދި އެކަން އެންމެ ބޮޑަށް ދެނެގަތީ 19 ވަނަ ރައްޔިތުންގެ މަޖިލީހުގައި ކަމަށް ދެންނެވުމަކީވެސް ކުށަކަށް ނުވާނެ ކަމުގައި ސަލީމް ވިދާޅުވިއެވެ. 

ސަލީމް ވިދާޅުވީ، އެނގިފައި ވާހަކަތާއި ފެންނަން ހުރި މައުލޫމާތުތަކުން، ރައްޔިތުންގެ މަޖިލީހުގެ ޤާބިލްކަން ކުރިއަރުވައި ތަރައްޤީކުރުމަށް، ނިމިދިޔަ މަޖިލިސް ތަކުގައި އެކަށީގެންވާ މަސައްކަތްތަކެއްކޮށްފައި ނެތްކަމަށެވެ. 

ސަލީމް ވިދާޅުވީ، ރައީސް ނަޝީދު ކުރެއްވި މަސައްކަތްޕުޅުގެ ނަތީޖާއެއްގެ ގޮތުން، އެމަނިކުފާނަށްވެސް އިނގިރޭސި ވިލާތަށް ވަޑައިގެން، އިނގިރޭސި ޤާނޫނު ހަދާ މަޖިލީހުގެ މަސައްކަތްތައް ހިނގާގޮތް ބަލައިލުމުގެ ފުުރުޞަތު ލިބިގެން ދިޔަކަމަށެވެ. 

އަދި ވެސްޓް މިނިސްޓަރސް ފައުންޑޭޝަން އާއި އެކު ޤާއިމްކުރެވުނު ގުޅުމަކީ، މަޖިލީހުގެ ކަންކަން ރަނގަޅު ކުރުމަށް ކުރެވުނު، ފައިދާހުރި ވަރަށް މުހިއްމު ކަމެއް ކަމުގައިވެސް މަޖިލީހުގެ ނައިބު ރައީސް އަޙްމަދު ސަލީމް ވިދާޅުވިއެވެ.