ރާއްޖޭގެ ފަތުރުވެރިކަމުގެ ތާރީޚުގައި ފުރަތަމަ ފަހަރަށް އެއްދުވަހެއްގައި އައި ފަތުރުވެރިންގެ އަދަދު ދިހަ ހާހުން މައްޗަށް އަރާނެ ކަމުގައި ޓޫރިޒަމް މިނިސްޓަރ ވިދާޅުވެއްޖެއެވެ.

މިއަދު ރާއްޖެއަށް 10،213 ފަތުރުވެރިން ޒިޔާރަތްކުރާނޭ ކަމަށް ޓޫރިޒަމް މިނިސްޓަރ އިބްރާހީމް ފައިސަލް ވަނީ ވިދާޅުވެފައެވެ. 

ހުސްވި ހަފްތާގައި ވެސް ވަނީ ރާއްޖެ އަންނަ ފަތުރުވެރިންގެ އަދަދު 8000 އިން މައްޗަށް އަރައި ފަތުރުވެރިކަމުގެ އައު ރެކޯޑެއް ޤާއިމްކުރެވިފައެވެ.

ރާއްޖެއަންނަ ފަތުރުވެރިންގެ އަދަދު ރެކޯޑް މިންވަރަކަށް މަތިވާން މިފެށީ، ކޯވިޑުގެ ފުރަބަންދުތަކަށް ފަހު، ޗައިނާ އާއި ޔޫރަޕުން އަންނަ ފަތުރުވެރިންގެ އަދަދު އިތުރުވާން ފެށުމުންނެވެ.

ފަތުރުވެރިކަމުގެ ތަފާސް ހިސާބުތަކުން ދައްކާ ގޮތުގައި މިދިޔަމަހު ރާއްޖެއަށް އެންމެ ގިނަ ފަތުރުވެރިން އައިސްފައި ވަނީ، ޗައިނާއިންނާއި ޔޫރަަޕްގެ ޤައުމެއް ކަމުގައިވާ އިޓަލީންނެވެ. މިއަހަރުގެ މިހާތަނަށް ރާއްޖެ އައި ފަތުރުވެރިންގެ އަދަދު މިހާރު ވަނީ ދެ ލައްކައަށްވުރެ މައްޗަށް ގޮސްފައެވެ.

ކޯވިޑަށްފަހު، ރާއްޖެއަށް އެންމެ ގިނައިން ފަތުރުވެރިން ޒިޔާރަތް ކުރަމުން އައީ އިންޑިއާއިން ކަމުގައި ވީނަމަވެސް، އިންޑިއާ އާއި ދިވެހިރާއްޖޭގެ މެދުގައި އުފެދިފައިވާ ސިޔާސީ ނުތަނަވަސްކަމާއި، ރާއްޖެ ބޮއިކޮޓް ކުރުމަށް އިންޑިއާގައި ހިންގަމުން އަންނަ ކެމްޕޭންތަކާއި ގުޅިގެން އެޤައުމުން ރާއްޖެއަށް އަންނަ ފަތުރުވެރިންގެ އަދަދު ވަނީ ވަރަށް ބޮޑުތަން މަދުވެފައެވެ.